തൃശൂര്‍: സംസ്ഥാന സ്‌കൂള്‍ കലോത്സവത്തില്‍ വ്യാജ അപ്പീലുമായി ബന്ധപ്പെട്ട് രണ്ടുപേര്‍ അറസ്റ്റില്‍. തൃശൂര്‍ ചേര്‍പ്പ് സ്വദേശിയും നൃത്ത അധ്യാപകനുമായ സൂരജ്, ഇടനിലക്കാരന്‍ കോഴിക്കോട് സ്വദേശി ജോബി എന്നിവരാണ് അറസ്റ്റിലായിത്.

തൃശൂരില്‍ നിന്നാണ് ഇവരെ ക്രൈംബ്രാഞ്ച് അറസ്റ്റ് ചെയ്തത്. രണ്ടുപേരെയും തൃശൂര്‍ പൊലിസ് ക്ലബില്‍ ക്രൈംബ്രാഞ്ച് ദക്ഷിണമേഖലാ ഐ.ജി എസ്.ശ്രീജിത്തിന്റെ നേതൃത്വത്തില്‍ ചോദ്യം ചെയ്തു. വ്യാജ അപ്പീലുമായി ബന്ധപ്പെട്ട് കൂടുതല്‍ അറസ്റ്റുണ്ടായേക്കുമെന്നാണ് ക്രൈംബ്രാഞ്ച് നല്‍കുന്ന സൂചന.

കഴിഞ്ഞ ദിവസമാണ് ബാലവാകശ കമ്മിഷന്റെ പേരുള്ള നാല് വ്യാജ അപ്പീലുകള്‍ പിടികൂടിയത്. മലപ്പുറം, തൃശൂര്‍ ജില്ലകളില്‍ നിന്നായി രണ്ടു വീതം ഉത്തരവുകളാണ് വ്യാജമായി നിര്‍മിച്ചത്.

ഇംഗ്ലീഷിലുള്ള ഉത്തരവില്‍ ബാലാവകാശ കമ്മിഷന്റെ ലോഗോ ഉപയോഗിച്ചിരുന്നില്ല. സീലും തെറ്റായിരുന്നു. രണ്ട് അംഗങ്ങളും ചെയര്‍പേഴ്‌സണും ഉത്തരവിടുന്നതായാണ് കാണിച്ചിരുന്നത്. ഈ രണ്ട് അംഗങ്ങളുടേയും കാലാവധി മാസങ്ങള്‍ക്ക് മുന്‍പ് കഴിഞ്ഞതായിരുന്നു. ഇതുവരെ പതിനഞ്ചോളം വ്യാജ അപ്പീലുകള്‍ സമര്‍പ്പിച്ചതായാണ് കണക്കാക്കുന്നത്.