തിരുവനന്തപുരം: എല്‍.ഡി.എഫ് സര്‍ക്കാരിന്റെ സത്യപ്രതിജ്ഞാ ചടങ്ങിനിടെ സി.പി.എം ജനറല്‍ സെക്രട്ടറി സീതാറാം യെച്ചൂരിക്ക് കുറിപ്പ് കൈമാറിയ വിവാദത്തില്‍ ഇപ്പോള്‍ പ്രതികരിക്കാന്‍ സമയമായിട്ടില്ലെന്ന് സി.പി.എം മുതിര്‍ന്ന നേതാവ് വി.എസ് അച്യുതാനന്ദന്‍. ജനറല്‍ സെക്രട്ടറി പറഞ്ഞത് എന്താണെന്ന് പരിശോധിക്കട്ടെയെന്ന് വി.എസ് പറഞ്ഞു.

മുഖ്യമന്ത്രിയുള്‍പ്പെടെയുള്ളവരുടെ സത്യപ്രതിജ്ഞാചടങ്ങിനിടെ സ്ഥാനമാനങ്ങള്‍ ആവശ്യപ്പെട്ടുകൊണ്ടുള്ള കുറിപ്പ് തനിക്കുനല്‍കിയതു വി.എസ് തന്നെയാണെന്നു യെച്ചൂരി വ്യക്തിമാക്കിയിരുന്നു.

കാബിനറ്റ് റാങ്കോടെ എല്‍.ഡി.എഫ് ചെയര്‍മാന്‍ സ്ഥാനവും സി.പി.എം സംസ്ഥാന സെക്രട്ടേറിയറ്റിലേക്കുള്ള മടങ്ങിവരവുമായിരുന്നു കുറിപ്പിന്റെ ഉള്ളടക്കം. വി.എസ് ഈ കുറിപ്പ് സദസില്‍ ഇരുന്നുവായിക്കുന്ന ചിത്രം പുറത്തു വന്നതോടെയുണ്ടായ വിവാദങ്ങളോടു പ്രതികരിക്കവെ വി.എസ് തനിക്ക് കുറിപ്പ് നല്‍കുകയായിരുന്നുവെന്ന് യെച്ചൂരി വ്യക്തമാക്കുകയായിരുന്നു.