കൊല്ലം: പരവൂര്‍ പുറ്റിങ്ങല്‍ ക്ഷേത്രത്തില്‍ നിര്‍മാണത്തിനിടെ സ്റ്റേജ് തകര്‍ന്ന് ഒന്‍പത് തൊഴിലാളികള്‍ക്ക് പരുക്കേറ്റു. ഇന്നലെ വൈകിട്ട് മൂന്നരയോടെയായിരുന്നു അപകടം. മൂന്നു പേരുടെ നില ഗുരുതരമാണ്.
സാരമായി പരുക്കേറ്റ കലയ്‌ക്കോട് കാഞ്ഞിരംവിള ഭദ്രന്‍(58), പുത്തന്‍കുളം സ്വദേശി സുരേഷ്(48), പരവൂര്‍ സ്വദേശി കുട്ടപ്പന്‍(55) എന്നിവരെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പരുക്കേറ്റ പെരുങ്കുളം സ്വദേശി ഗണേശ്(49), ഇടയാടി ജിജി സദനത്തില്‍ ബാബുരാജന്‍പിള്ള(61) എന്നിവരെ പാരിപ്പള്ളി ഇ.എസ്.ഐ മെഡിക്കല്‍ കോളജിലും ഊന്നിന്‍മൂട് കടയില്‍ വീട്ടില്‍ സജീവ്(39), പുത്തന്‍കുളം രാജു വിലാസത്തില്‍ രാജു(52), പൂതകുളം മുരുകാലയത്തില്‍ രാജു(55), ചാത്തന്നൂരില്‍ താമസിക്കുന്ന അസം സ്വദേശി വികാസ്(18)എന്നിവരെ നെടുങ്ങോലും താലൂക്കാശുപത്രിയിലും പ്രവേശിപ്പിച്ചു. ഇന്നലെ രാവിലെ കോണ്‍ക്രീറ്റ് നടന്ന മേല്‍ക്കൂരയാണ് തകര്‍ന്നു വീണത്. അന്‍പതോളം തൊഴിലാളികളാണ് കോണ്‍ക്രീറ്റിങിനുണ്ടായിരുന്നത്. ഇത് പൂര്‍ത്തിയാക്കി ഇവര്‍ മടങ്ങിയ ശേഷം അനുബന്ധ ജോലികള്‍ക്കായി സ്ഥലത്തുണ്ടായിരുന്ന തൊഴിലാളികളാണ് അപകടത്തില്‍പെട്ടത്. നാട്ടുകാരും ക്ഷേത്ര ജീവനക്കാരുമാണ് തൊഴിലാളികളെ ഇടിഞ്ഞു വീണ മേല്‍ക്കൂരയ്ക്കടിയില്‍ നിന്ന് പുറത്തെടുത്തത്. സംഭവ സ്ഥലത്ത് എത്തിയ ജില്ലാ കലക്ടര്‍ ഡോ. എസ്. കാര്‍ത്തികേയന്‍ നെടുങ്ങോലം താലൂക്ക് ആശുപത്രിയില്‍ ചികിത്സയില്‍ കഴിയുന്നവരെ സന്ദര്‍ശിച്ചു. സംഭവത്തില്‍ കരാറുകാരനെതിരേ കേസെടുത്തു.