കോവളം: നിയന്ത്രണം വിട്ട കാര്‍ റോഡരികിലെ വീടിന്റെ മതിലില്‍ ഇടിച്ച് ഉയര്‍ന്നു പൊങ്ങി കാല്‍നടയാത്രികന്റെ മുകളില്‍ പതിച്ചു. കാല്‍നടയാത്രികനായ കട്ടച്ചല്‍ കുഴി ചരുവിള പുത്തന്‍വീട്ടില്‍ നാണുക്കുട്ടന്‍ നായര്‍ (68) ആശുപത്രിയിലേക്കുള്ള വഴിമധ്യേ മരിച്ചു.
ഇന്നലെ പുലര്‍ച്ചെ അഞ്ചരയോടെ മുക്കോല ബാലരാമപുരം റോഡില്‍ ഉച്ചക്കടക്ക് സമീപത്തായിരുന്നു അപകടം. സുഹൃത്തിന്റെ വിവാഹത്തിന് പങ്കെടുക്കാനായി ബാലരാമപുരത്തേക്ക് പോവുകയായിരുന്ന കൊല്ലം കടക്കല്‍ സ്വദേശികള്‍ സഞ്ചരിച്ചിരുന്ന ടെയോട്ട കാറാണ് അപകടത്തില്‍പ്പെട്ടത്. നിയന്ത്രണം വിട്ട കാര്‍ റോഡിന്റെ മറുവശത്തെ വീടിന്റെ മതിലില്‍ ഇടിച്ച് ഉയര്‍ന്നു പൊങ്ങി നാണുക്കുട്ടന്‍ നായരുടെ മുകളിലേക്ക് പതിക്കുകയായിരുന്നുവെന്ന് പൊലിസ് പറഞ്ഞു.കാര്‍ യാത്രികര്‍ പരുക്കുകളില്ലാതെ രക്ഷപ്പെട്ടു.
ഉച്ചക്കടയില്‍ ഹോട്ടല്‍ തൊഴിലാളിയായ നാണുക്കുട്ടന്‍ രാവിലെ ജോലിക്ക് പോകുമ്പോഴാണ് അപകടത്തില്‍പെട്ടത്.പോലിസും ആംബുലന്‍സും വരാന്‍ വൈകിയതിനാല്‍ ഗുരുതരമായി പരുക്കേറ്റ വൃദ്ധന്‍ മുക്കാല്‍ മണിക്കൂറോളം റോഡില്‍ കിടന്നതായി നാട്ടുകാര്‍ പറയുന്നു.
ഭാര്യ ശാന്തകുമാരിയമ്മ, മക്കള്‍ അനില്‍ കുമാര്‍, ഗീത കുമാരി.പരേതനായ അമ്പാടി മരുമകനാണ്.പോസ്റ്റുമാര്‍ട്ടത്തിന് ശേഷം ബന്ധുക്കള്‍ക്ക് വിട്ടു നല്‍കിയ മൃതദേഹം വീട്ടു വളപ്പി സംസ്‌കരിച്ചു.വിഴിഞ്ഞം പൊലിസ് കേസെടുത്തു.