മാഡ്രിഡ്: വലന്‍സിയയെ അവരുടെ തട്ടകത്തില്‍ മറുപടിയില്ലാത്ത രണ്ട് ഗോളുകള്‍ക്ക് തകര്‍ത്ത് ബാഴ്‌സലോണ സ്പാനിഷ് കിങ്‌സ് കപ്പിന്റെ ഫൈനലിലേക്ക് കടന്നു. ആദ്യ പാദ പോരാട്ടത്തില്‍ സ്വന്തം തട്ടകത്തില്‍ മറുപടിയില്ലാത്ത ഒരു ഗോളിന് വിജയിച്ചാണ് ബാഴ്‌സലോണ രണ്ടാം പാദ പോരിനായി ഇറങ്ങിയത്. ഇരു പാദങ്ങളിലായി 3-0ത്തിനാണ് നിലവിലെ ചാംപ്യന്‍മാര്‍ കൂടിയായ ബാഴ്‌സലോണ സെമിയില്‍ വിജയിച്ചത്.
ലിവര്‍പൂളില്‍ നിന്ന് റെക്കോര്‍ഡ് തുകയ്ക്ക് ടീമിലെത്തിച്ച ബ്രസീല്‍ താരം ഫിലിപ്പ് കുട്ടീഞ്ഞോ ക്ലബിനായി തന്റെ കന്നി ഗോള്‍ കണ്ടെത്തിയതാണ് മത്സരത്തിന്റെ സവിശേഷത. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 49ാം മിനുട്ടിലാണ് കുട്ടീഞ്ഞോ വല ചലിപ്പിച്ചത്. 82ാം മിനുട്ടില്‍ ഇവാന്‍ റാകിറ്റിച് ബാഴ്‌സയുടെ പട്ടിക പൂര്‍ത്തിയാക്കി.
സെവിയ്യയാണ് ബാഴ്‌സലോണയുടെ ഫൈനലിലെ എതിരാളികള്‍. ഈ മാസം 21നാണ് ഫൈനല്‍ പോരാട്ടം അരങ്ങേറുന്നത്. 2016ലെ ഫൈനല്‍ പോരാട്ടത്തിന്റെ ആവര്‍ത്തനമായി ഇത്തവണത്തെ മത്സരം മാറി. അന്ന് സെവിയ്യയെ കിഴടക്കിയാണ് ബാഴ്‌സ കിരീടം സ്വന്തമാക്കിയത്. തുടര്‍ച്ചയായി നാലാം വട്ടവും ചാംപ്യന്‍ പദവി ലക്ഷ്യമിടുന്ന ബാഴ്‌സലോണ 30ാം കിരീട നേട്ടമാണ് ഫൈനലില്‍ വിജയിച്ചാല്‍ സ്വന്തമാക്കാനൊരുങ്ങുന്നത്.