നാദാപുരം: എന്‍ജിനീയറിങ് കോളജ് വിദ്യാര്‍ഥി ജിഷ്ണു പ്രണോയിയുടെ കൊലക്കു കാരണക്കാരായ പ്രതികളെ ഉടന്‍ തന്നെ അറസ്റ്റ് ചെയ്ത് ജയിലടക്കണമെന്ന് കാണിച്ച് ഭരണ പരിഷ്‌കരണ കമ്മിറ്റി ചെയര്‍മാന്‍ വി.എസ് അച്യുതാനന്ദന്‍ മുഖ്യമന്ത്രി പിണറായി വിജയന് കത്തുനല്‍കി.
ജിഷ്ണു പ്രണോയിയുടെ അമ്മ വി.എസ് അച്യുതാനന്ദന് കഴിഞ്ഞ ദിവസം നല്‍കിയ പരാതിയുടെ തുടര്‍ച്ചയായാണ് ശക്തമായ നടപടി വേണമെന്ന് ആവശ്യവുമായി മുഖ്യമന്ത്രി പിണറായി വിജയന് കത്ത് നല്‍കിയത്. കുറ്റക്കാരെ ഉടന്‍തന്നെ അറസ്റ്റ് ചെയ്ത് ജയിലടയ്ക്കണമെന്നും, കൃത്യമായ തെളിവെടുപ്പിന് ശേഷം ഇവര്‍ക്കെതിരേ കൊലക്കുറ്റത്തിന് കേസെടുക്കണമെന്നും അദ്ദേഹം ആവശ്യപ്പെട്ടു.
കൂടാതെ കേസില്‍, സ്‌പെഷല്‍ പ്രോസിക്ക്യൂട്ടറെ ഉടന്‍ നിയമിക്കണമെന്നും കുടുംബം ആരോപിക്കുന്ന ഉദ്യോഗസ്ഥര്‍ക്കെതിരേ കര്‍ശന നടപടി എടുക്കണമെന്നുംകത്തില്‍ പറയുന്നു.
നെഹ്‌റുകോളജ് കൈയേറിയ ഭൂമി ഉടന്‍ തിരിച്ചുപിടിക്കണമെന്ന് വി.എസ് വനം മന്ത്രിക്ക് നല്‍കിയ കത്തില്‍ ആവശ്യപ്പെട്ടു.
വനം കൈയേറാന്‍ കൂട്ടുനിന്ന ഉദ്യോഗസ്ഥരെ കണ്ടെണ്ടത്തുകയും ഈ സംഭവത്തില്‍ ആരോപണ വിധേയമായവര്‍ക്കെതിരേ അന്വേഷണം നടത്തണമെന്നുംആവശ്യപ്പെട്ട് വിജിലന്‍സ് ഡയറക്ടര്‍ക്കും വി.എസ് കത്തു നല്‍കിയിട്ടുണ്ടെണ്ടന്ന് വി.എസിന്റെ ഓഫിസില്‍ നിന്നു ബന്ധുക്കളെ അറിയിച്ചു.
വ്യാഴാഴ്ച ജിഷ്ണുവിന്റെ വീട് സന്ദര്‍ശിച്ച അദ്ദേഹം പ്രതികള്‍ക്കെതിരേ കൊലക്കുറ്റത്തിന് കേസെടുക്കണമെന്നു ശക്തമായി ആവശ്യപ്പെട്ടിരുന്നു .