കോഴിക്കോട്: പയിമ്പ്ര മൈലാടും മലയില്‍ ഊരാളുങ്കല്‍ ലേബര്‍ സൊസൈറ്റിയുടെ ഉടമസ്ഥതയിലുള്ള സ്ഥലത്ത് തീപിടിച്ചു. ഏകദേശം അഞ്ച്് ഏക്കറോളം സ്ഥലത്തെ മരങ്ങളും കശുമാവും കത്തിനശിച്ചു. ഉച്ചക്ക് രണ്ടിന് ആരംഭിച്ച തീ വൈകിട്ട് 6:30നാണ് നിയന്ത്രണ വിധേയമായത്. ഫയര്‍ഫോഴ്‌സ് വാഹനത്തിന് എത്തിച്ചേരാന്‍ കഴിയാത്ത സ്ഥലമായതിനാല്‍ പച്ചിലക്കമ്പും മറ്റും ഉപയോഗിച്ച് ഏറെ പണിപ്പെട്ടാണ് തീയണച്ചത്. തീ കുന്നിന്‍ ചരുവിലെ വീടുകളിലേക്കും കൃഷിയിടത്തിലേക്കും പടരാതെ കെടുത്താനായതിനാല്‍ വന്‍ നാശനഷ്ടം ഒഴിവായി. വെള്ളിമാടുകുന്ന് ഫയര്‍ സ്റ്റേഷനിലെ ലീഡിങ് ഫയര്‍മാന്‍ അബ്ദ്ദുല്‍ ഫൈസിയുടെ നേതൃത്വത്തില്‍ ഡസനിലധികം സേനാംഗങ്ങളും നാട്ടുകാരും ചേര്‍ന്നാണ് തീയണച്ചത്.