സുല്‍ത്താന്‍ ബത്തേരി: ദേശീയപാതയിലെ രാത്രിയാത്രാ നിരോധനം നീക്കണമെന്നാവശ്യപ്പെട്ട് ഫ്രീഡം ടു മൂവിന്റെ നേതൃത്വത്തില്‍ ഈ മാസം 25ന് 1000പേര്‍ പങ്കെടുക്കുന്ന ബൈക്ക് റാലി നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. സംസ്ഥാന അതിര്‍ത്തിയായ മൂലഹള്ളയില്‍നിന്നും ആരംഭിക്കുന്ന റാലി ലക്കിടിയില്‍ പര്യടനം നടത്തി കല്‍പ്പറ്റയില്‍ സമാപിക്കും. വൈകിട്ട് കല്‍പ്പറ്റയില്‍ നടക്കുന്ന സമാപന സമ്മേളനത്തില്‍ എം.എല്‍.എമാരായ സി.കെ ശശീന്ദ്രന്‍, ഐ.സി ബാലകൃഷ്ണന്‍ എന്നിവര്‍ പങ്കെടുക്കും.ഉച്ചക്ക് 12.30ന് ആരംഭിക്കുന്ന റാലിക്ക് കല്ലൂര്‍, നായ്‌ക്കെട്ടി, മൂലങ്കാവ്, ബത്തേരി, മീനങ്ങാടി, മുട്ടില്‍, ചുണ്ടേല്‍, വൈത്തിരി എന്നിവിടങ്ങില്‍ സ്വീകരണം നല്‍കും. റാലിയുമായി ബന്ധപെട്ട സ്വാഗതസംഘ രൂപീകരണം ഇന്ന് വൈകിട്ട് നാലിന് ബത്തേരി വ്യാപാര ഭവനില്‍ നടക്കും. നിരോധനം നീക്കുന്നതിന് കേന്ദ്ര-കര്‍ണാടക സര്‍ക്കാറുകളില്‍ സമ്മര്‍ദ്ദം ചെലുത്താന്‍ സംസ്ഥാന സര്‍ക്കാര്‍ ഇടപെടുക എന്നാവശ്യപ്പെട്ടാണ് റാലി.
ഫ്രീഡം ടു മൂവ് ചെയര്‍മാന്‍ എ.കെ ജിതൂഷ്, കണ്‍വീനര്‍ റ്റിജി ചെറുതോട്ടില്‍, കോര്‍ഡിനേറ്റര്‍ സഫീര്‍ പഴേരി, യഹിയ ചേനക്കല്‍, കെ.എന്‍ സജീവ്, സക്കറിയ വാഴക്കണ്ടി, പ്രദീപ്, ശ്യാംജിത്ത് ദാമു, സെബാസ്റ്റ്യന്‍ ചക്കാലക്കല്‍ തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു.