ഷിംല: ഹിമാചല്‍ പ്രദേശിലെ ലാഹോള്‍സ്പിതി ജില്ലയില്‍ മലയിടിഞ്ഞ് ടാക്‌സിക്ക് മുകളില്‍ പതിച്ചതിനെ തുടര്‍ന്ന് 13 പേര്‍ മരിച്ചു. ലാഹോള്‍സ്പിതി ജില്ലയിലെ ഉദയ്പുര്‍-പംഗി റോഡിലെ കാഡു നാളയ്ക്ക് സമീപമാണ് ദാരുണ അപകടം നടന്നത്. അപകടത്തില്‍ പരുക്കേറ്റ ഒരാളെ രക്ഷപ്പെടുത്തി ആശുപത്രിയില്‍ പ്രവേശിപ്പിച്ചിരിക്കുകയാണ്. മറ്റ് യാത്രക്കാരെ കണ്ടെത്തുന്നതിനായി രക്ഷാപ്രവര്‍ത്തനം തുടരുകയാണെന്ന് അധികൃതര്‍ അറിയിച്ചു.

ഓടിക്കൊണ്ടിരുന്ന ടാക്‌സിക്ക് മുകളിലേക്ക് പര്‍വതത്തിന്റെ ഒരു വലിയ ഭാഗം പെട്ടെന്ന് ഇടിഞ്ഞുവീഴുകയായിരുന്നുവെന്ന് പൊലിസ് അറിയിച്ചു. മണ്ണും വലിയ പാറക്കല്ലുകളും വാഹനത്തിന് മുകളിലേക്ക് പതിച്ചതോടെ ടാക്‌സി പൂര്‍ണമായും മണ്ണിനടിയിലാവുകയും യാത്രക്കാര്‍ അതിനുള്ളില്‍ കുടുങ്ങുകയും ചെയ്തു.

ALSO READ: വടക്കന്‍ ജില്ലകളില്‍ നാളെ ശക്തമായ മഴ; രണ്ട് ജില്ലകളില്‍ യെല്ലോ അലര്‍ട്ട്  

വാഹനത്തില്‍ ആകെ 15 യാത്രികരാണ് ഉണ്ടായിരുന്നതെന്ന് പൊലിസ് വ്യക്തമാക്കി. അപകടത്തില്‍പ്പെട്ടവരില്‍ ഭൂരിഭാഗവും പംഗി താഴ്‌വരയിലേക്കുള്ള യാത്രക്കാരാണെന്നാണ് പ്രാഥമിക വിവരം.

മണ്ണിടിച്ചിലിനെ തുടര്‍ന്ന് ഒരു ദിവസം അടച്ചിട്ടിരുന്ന ഉദയ്പുര്‍-പംഗി റോഡ് വെള്ളിയാഴ്ചയാണ് വീണ്ടും ഗതാഗതത്തിനായി തുറന്നത്. റോഡ് അടച്ചിരുന്നതിനാല്‍ യാത്രാസംഘം നേരത്തെ ടിന്‍ഡി പ്രദേശത്ത് കുടുങ്ങിയിരുന്നു. ഗതാഗതം പുനഃസ്ഥാപിച്ചതോടെ യാത്ര തുടരുന്നതിനിടെയാണ് ദുരന്തമുണ്ടായത്.

രക്ഷാപ്രവര്‍ത്തനത്തിനായി പൊലിസ്, ദുരന്തനിവാരണ സേന, പ്രാദേശിക ഭരണകൂടം എന്നിവരുടെ നേതൃത്വത്തില്‍ തിരച്ചില്‍ തുടരുകയാണ്. പ്രദേശത്ത് കൂടുതല്‍ മണ്ണിടിച്ചിലിന് സാധ്യതയുള്ളതിനാല്‍ അതീവ ജാഗ്രതയോടെയാണ് രക്ഷാപ്രവര്‍ത്തനം നടത്തുന്നത്.

13 people died in Himachal Pradesh's Lahaul-Spiti district after a landslide fell on a taxi.The tragic accident occurred near Kadu Nala on the Udaipur-Pangi road in Lahaul-Spiti district.