തിരുവനന്തപുരം: സംസ്ഥാന പൊലിസ് മേധാവി സ്ഥാനത്ത് നിന്ന് നീക്കിയ ടി.പി സെന്‍കുമാര്‍ അവധിയില്‍ പ്രവേശിച്ചു. മൂന്നു ദിവസത്തെ അവധിയിലാണ് അദ്ദേഹം പ്രവേശിച്ചത്. സംസ്ഥാന പൊലിസ് മേധാവിയായിരുന്ന ടി.പി സെന്‍കുമാറിനെ കഴിഞ്ഞ ദിവസമാണ് സര്‍ക്കാര്‍ സ്ഥാനത്ത് നിന്നും മാറ്റിയത്. ഫയര്‍ഫോഴ്‌സ് മേധാവിയായിരുന്ന ലോക്‌നാഥ് ബെഹ്‌റയാണ് പുതിയ ഡി.ജി.പിയായി ചുമതലയേല്‍ക്കുന്നത്.

ഈ തീരുമാനത്തില്‍ താന്‍ തൃപ്തനല്ലെന്നും എന്നാല്‍, സര്‍ക്കാരിന്റെ തീരുമാനമാണിത്. സര്‍ക്കാരിന് തന്നെ വിശ്വാസമില്ലെങ്കില്‍ സ്ഥാനത്ത് തുടരുന്നതില്‍ അര്‍ഥമില്ലെന്നും അദ്ദേഹം പറഞ്ഞിരുന്നു. തന്നെ നീക്കിയതില്‍ ചട്ടലംഘനം ഉണ്ടെന്നും അദ്ദേഹം പറഞ്ഞു. സര്‍ക്കാരിന് ഉദ്യോഗസ്ഥരെ മാറ്റാനുള്ള അധികാരമുണ്ട് എന്നാല്‍ ഈ നടപടി സുപ്രിം കോടതി വിധിക്കും പൊലിസ് ആക്ടിനും വിരുദ്ധമാണെന്നും ആവശ്യമെങ്കില്‍ നിയമനടപടി സ്വീകരിക്കുമെന്നും അദ്ദേഹം പറഞ്ഞിരുന്നു.

ഡി.ജി.പി ആയിരുന്ന ടി.പി സെന്‍കുമാറിനെ കേരള പൊലിസ് ഹൗസിങ് കണ്‍സ്ട്രക്ഷന്‍ കോര്‍പറേഷന്റെ എം.ഡിയായാണ് നിയമിച്ചത്. തല്‍ക്കാലം പുതിയ സ്ഥാനം ഏറ്റെടുത്തേക്കില്ല എന്ന റിപ്പോര്‍ട്ടുകളുണ്ടായിരുന്നു. ഇതിനു പിന്നാലെയാണ് സെന്‍കുമാര്‍ അവധിയില്‍ പ്രവേശിച്ചത്. വിരമിക്കലിന് ഒരു വര്‍ഷം മാത്രം ബാക്കിയുള്ള ടി.പി. സെന്‍കുമാറിനെ പൊലിസ് മേധാവി സ്ഥാനത്ത് നിന്ന് മാറ്റാന്‍ തിങ്കളാഴ്ചയാണ് സംസ്ഥാന സര്‍ക്കാര്‍ തീരുമാനിച്ചത്. ബെഹ്‌റയ്ക്ക് അഞ്ചു വര്‍ഷത്തെ സര്‍വീസ് ബാക്കിയുണ്ട്.