നേമം: മൂക്കുന്നിമലയില്‍ വീണ്ടും വന്‍ തീപിടുത്തം. ഏക്കറുകളോളം കാട് കത്തി നശിച്ചുവെന്നാണ് വിവരം. ഇന്നലെ ഉച്ചയോടെ തുടങ്ങിയ തീപിടുത്തം രാത്രിയിലും നിയന്ത്രണ വിധേയമാക്കാന്‍ സാധിച്ചിട്ടില്ല. സംഭവത്തിനു പിന്നില്‍ ക്വാറി മാഫിയകളാണെന്ന ആരോപണവുമായി നാട്ടുകാര്‍ രംഗത്തിട്ടുണ്ട്.
തീപിടുത്ത വിവരമറിഞ്ഞ് ഫയര്‍ഫോഴ്‌സ് യൂനിറ്റുകള്‍ മൂക്കുന്നിമലയിലെത്തിയെങ്കിലും തീപിടിച്ച ഭാഗത്തേക്ക് പോകാന്‍ കഴിഞ്ഞില്ല.മൂക്കുന്നിമലയിലുളള റഡാര്‍ സ്റ്റേഷനു സമീപത്താണ് തീപിടിത്തമുണ്ടായത്. ഇവിടേക്കുള്ള റോഡ് മാഫിയാകള്‍ കൈയടക്കി അഗാത ഗര്‍ത്തങ്ങളാക്കി മാറ്റിയിരിക്കുകയാണ്.
വൈകിട്ട് അറു മണിയോടെ തീ അണഞ്ഞുവെന്ന് കരുതിയെങ്കിലും രാത്രി വീണ്ടും ആളിപ്പടര്‍ന്നു.ആഴ്ചകള്‍ക്കു മുന്‍പും ഇവിടെ തീപിടുത്തത്തില്‍ വ്യാപക നഷ്ടമുണ്ടായിരുന്നു.