പാലക്കാട്: അട്ടപ്പാടിയില്‍ മര്‍ദ്ദനമേറ്റു കൊല്ലപ്പെട്ട ആദിവാസി യുവാവ് മധുവിന്റെ മരണത്തില്‍ കാരണക്കാരായ മുഴുവന്‍ പ്രതികളെയും പിടികൂടണമെന്നാവശ്യപ്പെട്ട് മധുവിന്റെ മൃതദേഹം വഹിച്ചുള്ള ആംബുലന്‍സ് തടഞ്ഞു. മുക്കാലിയില്‍ വച്ച് ആദിവാസി സംഘടനകളാണ് ആംബുലന്‍സ് തടഞ്ഞത്. എന്നാല്‍, പ്രാദേശിക നേതാക്കളും പൊലിസും പ്രതിഷേധക്കാരുമായി നടത്തിയ ചര്‍ച്ചയെ തുടര്‍ന്നാണ് ആംബുലന്‍സ് യാത്ര ആരംഭിച്ചത്.

മുഴുവന്‍ പ്രതികളെയും അറസ്റ്റ് ചെയ്യാതെ മൃതദേഹം കൊണ്ടുപോകാന്‍ അനുവദിക്കില്ലെന്ന നിലപാടിലാണ് ആദിവാസി സംഘടനകള്‍ ആംബുലന്‍സ് തടഞ്ഞത്. സംഭവത്തില്‍ പൊലിസ് അറസ്റ്റ് ചെയ്ത പ്രതികളുടെ വിവരങ്ങള്‍ അറിയിച്ചതിനെ തുടര്‍ന്നാണ് പ്രതിഷേധക്കാര്‍ പിന്മാറിയത്.