കോഴിക്കോട്: കേരളാ കോണ്‍ഗ്രസിന്റെ ഇടതുമുന്നണി പ്രവേശനം സംബന്ധിച്ച് സി.പി.ഐ സംസ്ഥാന സെക്രട്ടറി കാനം രാജേന്ദ്രന്റെ പ്രതികരണം അപകര്‍ഷതാബോധം കൊണ്ടാണെന്ന് കേരളാ കോണ്‍ഗ്രസ് (എം) ചെയര്‍മാന്‍ കെ.എം മാണി. കേരളാ കോണ്‍ഗ്രസിന്റെ ശക്തി എന്താണെന്ന് അറിയണമെങ്കില്‍ കാനം കാനനവാസം വെടിഞ്ഞ് നാട്ടിലിറങ്ങണമെന്നും അദ്ദേഹം പരിഹസിച്ചു. കേരളാ കോണ്‍ഗ്രസ് (എം) ജില്ലാ നേതൃസംഗമം ഉദ്ഘാടനം ചെയ്യവെയായിരുന്നു കാനത്തിനെതിരേ മാണിയുടെ രൂക്ഷവിമര്‍ശനം.
മുന്നണി പ്രവേശനവുമായി ബന്ധപ്പെട്ടുള്ള ചര്‍ച്ചകള്‍ നിര്‍ത്തുന്നതാണു സി.പി.ഐക്കും കാനത്തിനും നല്ലത്. ഈ വിഷയത്തില്‍ ഇനിയൊരു മറുപടിയുണ്ടാവില്ലെന്നും കാനത്തിനുള്ള മറുപടി അവസാനിപ്പിക്കുകയാണെന്നും മാണി പറഞ്ഞു.
ഒരുപാട് മഹാരഥന്‍മാര്‍ നേതൃത്വം നല്‍കിയ പാര്‍ട്ടിയാണ് സി.പി.ഐ. ആ പാര്‍ട്ടിയുടെ തലപ്പത്തിരുന്ന് അന്തസില്ലാത്ത പ്രസ്താവന നടത്തുന്നതു നിര്‍ത്തണം. ഇടതുമുന്നണിയില്‍ എടുക്കണമെന്ന് ആവശ്യപ്പെട്ട് കേരളാ കോണ്‍ഗ്രസ് ആര്‍ക്കും അപേക്ഷ നല്‍കിയിട്ടില്ല. തനിച്ചുനിന്ന് തെരഞ്ഞെടുപ്പുകള്‍ ജയിച്ച പാര്‍ട്ടിയാണു കേരളാ കോണ്‍ഗ്രസ്. പാര്‍ട്ടിക്കു പ്രവര്‍ത്തിക്കാന്‍ കാനത്തിന്റെ സര്‍ട്ടിഫിക്കറ്റ് ആവശ്യമില്ലെന്നും മാണി വ്യക്തമാക്കി.