ദുബൈ: നേരിട്ടുള്ള വിദേശ നിക്ഷേപത്തിൽ (FDI) റെക്കോർഡ് മുന്നേറ്റവുമായി യുഎഇ. UNCTAD പുറത്തുവിട്ട 2026-ലെ ലോക നിക്ഷേപ റിപ്പോർട്ട് പ്രകാരം, 2025-ൽ മാത്രം 177.3 ബില്യൺ ദിർഹത്തിന്റെ വിദേശ നിക്ഷേപമാണ് യുഎഇയിൽ എത്തിയത്. ഇതോടെ വിദേശ നിക്ഷേപം സ്വീകരിക്കുന്ന ലോകരാജ്യങ്ങളുടെ പട്ടികയിൽ പത്താം സ്ഥാനത്തുനിന്ന് ഒമ്പതാം സ്ഥാനത്തേക്ക് യുഎഇ ഉയർന്നു.

മുൻവർഷത്തെ അപേക്ഷിച്ച് 6 ശതമാനം വളർച്ചയാണ് വിദേശ നിക്ഷേപത്തിൽ രേഖപ്പെടുത്തിയത്. ഇത് തുടർച്ചയായ നാലാം വർഷമാണ് യുഎഇ റെക്കോർഡ് എഫ്‌ഡിഐ ഒഴുക്കിന് സാക്ഷ്യം വഹിക്കുന്നത്. 2025 അവസാനത്തോടെ രാജ്യത്തെ മൊത്തം എഫ്‌ഡിഐ സ്റ്റോക്ക് 1.17 ട്രില്യൺ ദിർഹത്തിലെത്തിയിരുന്നു.

നിക്ഷേപങ്ങൾക്കും വൻ അവസരങ്ങൾക്കുമുള്ള ആഗോള ലക്ഷ്യസ്ഥാനമെന്ന നിലയിൽ യുഎഇ അതിന്റെ പദവി കൂടുതൽ ശക്തമാക്കുകയാണെന്ന് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു.

പുതിയ പദ്ധതികൾ തുടക്കമിടുന്ന 'ഗ്രീൻഫീൽഡ് പ്രോജക്ടുകളുടെ' എണ്ണത്തിൽ തുടർച്ചയായ മൂന്നാം വർഷവും ലോകമെമ്പാടും രണ്ടാം സ്ഥാനം നിലനിർത്താൻ യുഎഇക്ക് കഴിഞ്ഞു. ആകെ 1,562 ഗ്രീൻഫീൽഡ് പദ്ധതികളാണ് രാജ്യത്ത് നടപ്പിലാക്കിയത്.

രാജ്യത്ത് എത്തിയ എഫ്‌ഡിഐ നിക്ഷേപത്തിന്റെ 45 ശതമാനവും ഗ്രീൻഫീൽഡ് നിക്ഷേപങ്ങളായിരുന്നു. ലയനങ്ങളും ഏറ്റെടുക്കലുകളും 8 ശതമാനവും പുനർനിക്ഷേപം 11.2 ശതമാനവുമാണ്. ഈ പദ്ധതികൾ വഴി വിവിധ മേഖലകളിലായി 65,000-ത്തിലധികം പുതിയ തൊഴിലവസരങ്ങളാണ് യുഎഇയിൽ സൃഷ്ടിക്കപ്പെട്ടത്.

വ്യാവസായിക വികസന പദ്ധതികളുടെ കരുത്തിൽ 30% വിഹിതവുമായി നിർമ്മാണ മേഖല മുന്നിലെത്തി. അബുദാബിയിൽ ജി42-നൊപ്പം വികസിപ്പിക്കുന്ന 1 ജിഗാവാട്ട് എഐ കമ്പ്യൂട്ട് ക്ലസ്റ്ററും ഓപ്പൺഎഐയുടെ (OpenAI) ആദ്യ രാജ്യാന്തര വിന്യാസവും വഴി 29% നിക്ഷേപം എഐ മേഖലയും സ്വന്തമാക്കി. ആഗോള പ്രതിഭകളുടെയും കോടീശ്വരന്മാരുടെയും കുടിയേറ്റത്തോടെ റിയൽ എസ്റ്റേറ്റ് മേഖല 7% നിക്ഷേപവും രാജ്യത്തേക്ക് ആകർഷിച്ചു.

"2021 നും 2025 നും ഇടയിൽ 24% സംയുക്ത വാർഷിക വളർച്ചാ നിരക്കോടെയാണ് യുഎഇയുടെ നിക്ഷേപ മേഖല വികസിക്കുന്നത്. നിക്ഷേപം വെറുമൊരു മേഖലയിൽ ഒതുങ്ങാതെ വൈവിധ്യവൽക്കരിക്കപ്പെട്ടു എന്നത് ഈ വർഷത്തെ സവിശേഷതയാണ്." യുഎഇ നിക്ഷേപകാര്യ മന്ത്രിയായ മുഹമ്മദ് ഹസ്സൻ അൽസുവൈദി വ്യക്തമാക്കി.

ദേശീയ നിക്ഷേപ തന്ത്രം 2031-ന്റെ ഭാഗമായി, 2031 ആകുമ്പോഴേക്കും വാർഷിക എഫ്‌ഡിഐ ഒഴുക്ക് 240 ബില്യൺ ദിർഹമായും മൊത്തം എഫ്‌ഡിഐ സ്റ്റോക്ക് 2.2 ട്രില്യൺ ദിർഹമായും ഉയർത്താനാണ് യുഎഇ ലക്ഷ്യമിടുന്നത്. ഇതിനായി 2025 നവംബറിൽ യുഎഇ മന്ത്രിസഭ 36.7 ബില്യൺ ദിർഹത്തിന്റെ പ്രാരംഭ മൂലധനത്തോടെ 'ദേശീയ നിക്ഷേപ നിധിക്ക്' രൂപം നൽകിയിട്ടുണ്ട്.

ALSO READ: കുവൈത്തിനും ബഹ്റൈനും നേരെ വീണ്ടും ഇറാന്റെ പ്രകോപനം: സമുദ്ര സുരക്ഷയും ഊർജ്ജ വിതരണവും അപകടത്തിലെന്ന് യുഎഇ; കടുത്ത ഭാഷയിൽ വിമർശിച്ച് അൻവർ ഗർഗാഷ്

The UAE has secured a place among the world's top 10 destinations for foreign direct investment, attracting AED 177 billion and reinforcing its position as a leading global investment hub.