ലണ്ടന്‍: ബ്രിട്ടീഷ് നഗരമായ ലെയ്‌സെസ്റ്ററില്‍ സൂപ്പര്‍ മാര്‍ക്കറ്റിലുണ്ടായ സ്‌ഫോടനത്തില്‍ അഞ്ചുമരണം. നാലുപേരെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചു. സംഭവത്തില്‍ ഭീകരബന്ധമുള്ളതായി സ്ഥിരീകരിച്ചിട്ടില്ല. കഴിഞ്ഞ ദിവസം രാത്രിയാണ് നഗരത്തെ നടുക്കിയ സംഭവം. ലെയ്‌സെസ്റ്ററിലെ ഹിക്ലി റോഡിലുള്ള പോളിഷ് സൂപ്പര്‍മാര്‍ക്കറ്റിലാണ് ഉഗ്രശബ്ദത്തോടെ സ്‌ഫോടനമുണ്ടായത്. ഭൂകമ്പത്തെപോലെ എന്തോ തകര്‍ന്നുവീഴുന്ന ശബ്ദമാണുണ്ടായതെന്ന് ദൃക്‌സാക്ഷികള്‍ പറഞ്ഞു.
ഇരുനിലക്കെട്ടിടത്തിന്റെ താഴ്ഭാഗത്താണ് സ്‌ഫോടനമുണ്ടായത്. കട പൂര്‍ണമായും കത്തിത്തീര്‍ന്നിട്ടുണ്ട്. കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കിടക്കുന്നവര്‍ക്കായി രക്ഷാപ്രവര്‍ത്തനം തുടരുകയാണ്. ലെയ്‌സെസ്റ്റര്‍ പൊലിസ് കേസെടുത്ത് അന്വേഷണം ആരംഭിച്ചു.