മെക്‌സിക്കോ സിറ്റി: ഷൂട്ടിങ് ലോകകപ്പില്‍ ഇന്ത്യക്ക് രണ്ടാം സ്വര്‍ണം. വനിതകളുടെ പത്ത് മീറ്റര്‍ എയര്‍ പിസ്റ്റള്‍ വിഭാഗത്തില്‍ മനു ഭാസ്‌കറാണ് സ്വര്‍ണം സ്വന്തമാക്കിയത്. രണ്ട് വട്ടം ലോക പോരാട്ടത്തില്‍ സ്വര്‍ണം സ്വന്തമാക്കിയ മെക്‌സിക്കന്‍ താരം അലെജാന്ദ്ര സവലയെ അട്ടിമറിച്ചാണ് മനുവിന്റെ നേട്ടം. അലെജാന്ദ്ര 237.1 പോയിന്റ് നേടിയപ്പോള്‍ മനു 237.5 പോയിന്റുകള്‍ വെടിവച്ചിട്ടാണ് സുവര്‍ണ നേട്ടം സ്വന്തമാക്കിയത്. ഫ്രാന്‍സിന്റെ സെലിന്‍ ഗൊബര്‍വില്ലെ 217.0 പോയിന്റുകളുമായി വെങ്കലം നേടി.
നേരത്തെ പുരുഷ വിഭാഗം പത്ത് മീറ്റര്‍ എയര്‍ പിസ്റ്റള്‍ വിഭാഗത്തില്‍ ഇന്ത്യന്‍ യുവ താരം ഷഹ്‌സര്‍ റിസ്‌വി സ്വര്‍ണം നേടിയിരുന്നു. തന്റെ കന്നി ലോക പോരാട്ടത്തില്‍ തന്നെ താരം സുവര്‍ണ നേട്ടം സ്വന്തമാക്കി.
ഇതേ വിഭാഗത്തില്‍ വെങ്കലവും ഇന്ത്യക്ക് തന്നെയായിരുന്നു. ജിത്തു റായിയാണ് മെഡല്‍ നേടിയത്. പുരുഷന്‍മാരുടെ പത്ത് മീറ്റര്‍ എയര്‍ റൈഫിള്‍ വിഭാഗത്തില്‍ രവി കുമാറും ഇന്ത്യക്കായി വെങ്കലം സ്വന്തമാക്കി. ടൂര്‍ണമെന്റിലെ ഇന്ത്യയുടെ മൊത്തം മെഡല്‍ നേട്ടം രണ്ട് വീതം സ്വര്‍ണവും വെങ്കലവും അടക്കം നാലായി.