മുംബൈ: രാജ്യത്തിന്റെ സാമ്പത്തിക സ്ഥിതി ഇപ്പോഴും ഗുരുതരമായ അവസ്ഥയിലാണെന്ന് ആര്‍.ബി.ഐ വിലയിരുത്തല്‍. ഈ സാഹചര്യത്തില്‍ റിപ്പോ നിരക്ക് 0.25 ശതമാനം വര്‍ധിപ്പിച്ചേക്കുമെന്നാണ് സൂചന.
പണപ്പെരുപ്പ നിരക്കിലെ വര്‍ധനയും ധനകമ്മി കൂടുന്നതും നിരക്ക് വര്‍ധിപ്പിക്കാന്‍ ആര്‍.ബിഐ.യ്ക്കുമേല്‍ സമ്മര്‍ദമേറ്റുന്നുണ്ട്. അസംസ്‌കൃത എണ്ണവിലവര്‍ധിക്കുന്നതും കാര്‍ഷിക ഉല്‍പന്നങ്ങളുടെ വിലക്കയറ്റവും രാജ്യത്തെ പണപ്പെരുപ്പം ഉയരാനിടയാക്കുമെന്ന ഭീതി നിലനില്‍ക്കുന്നുണ്ട്. റീട്ടെയില്‍ പണപ്പെരുപ്പ നിരക്ക് നാല് ശതമാനത്തില്‍ പിടിച്ചു നിര്‍ത്താന്‍ ആര്‍.ബിഐ.യ്ക്ക് അടിയന്തര നടപടി സ്വീകരിക്കേണ്ടിവരും. റീട്ടെയില്‍ പണപ്പെരുപ്പം ആറ് ശതമാനത്തിലെത്തിക്കാനാകുമെന്നാണ് വിലയിരുത്തല്‍.
റിപ്പോ നിരക്കില്‍ 0.25ശതമാനമെങ്കിലും വര്‍ധന 2018ല്‍ പ്രതീക്ഷിക്കുന്നതായി കെയര്‍ റേറ്റിങ്‌സിന്റെ റിപ്പോര്‍ട്ടില്‍ പറയുന്നു. അടുത്ത സാമ്പത്തിക വര്‍ഷത്തിന്റെ പകുതിയോടെ പണപ്പെരുപ്പ നിരക്ക് 5.1 ശതമാനം മുതല്‍ 5.6ശതമാനം വരെ എത്തുമെന്നാണ് ആര്‍.ബി.ഐ വിലയിരുത്തുന്നത്. മഴലഭ്യത പണപ്പെരുപ്പത്തെ സ്വാധീനിക്കുന്ന പ്രധാന ഘടകമാകും.