മലപ്പുറം: എല്‍.ഡി.എഫ് ഭരണം ബാറില്‍ അവസാനിക്കുമെന്ന് പി.കെ കുഞ്ഞാലിക്കുട്ടി എം.പി. സര്‍ക്കാരിന്റെ ജനവിരുദ്ധ നയങ്ങള്‍ക്ക് ശക്തമായ തിരിച്ചടിയുണ്ടാകുമെന്നും തുടക്കം ചെങ്ങന്നൂര്‍ തെരഞ്ഞെടുപ്പില്‍ കാണുമെന്നും അദ്ദേഹം പറഞ്ഞു. മലപ്പുറത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു.
തദ്ദേശ സ്വയംഭരണ സ്ഥാപനങ്ങള്‍ക്കുള്ള അധികാരം എടുത്തുകളഞ്ഞത് മദ്യശാലകള്‍ അനുവദിക്കുന്നതിന്റെ ഭാഗമായിരുന്നു. സംസ്ഥാനത്തെ മദ്യത്തില്‍ മുക്കാനുള്ള നീക്കം എന്ത് വിലകൊടുത്തും ചെറുത്തുതോല്‍പ്പിക്കും. എന്നാല്‍ പുതിയ മദ്യനയത്തിനെതിരേ തദ്ദേശസ്ഥാപനങ്ങളും പൊതുജനങ്ങളും ഒറ്റക്കെട്ടായി പ്രവര്‍ത്തിക്കും. മദ്യനയത്തിനെതിരേ നടത്തുന്ന സമരങ്ങള്‍ക്ക് സര്‍വപിന്തുണയും നല്‍കുമെന്നും നിയമപരമായി നേരിടാന്‍ ആലോചിക്കുന്നുണ്ടെന്നും കുഞ്ഞാലിക്കുട്ടി പറഞ്ഞു. സമ്പൂര്‍ണ മദ്യസംസ്ഥാനമാക്കി കേരളത്തെ മാറ്റാനാണ് സര്‍ക്കാര്‍ ശ്രമിക്കുന്നതെന്ന് സാദിഖലി ശിഹാബ് തങ്ങള്‍ കുറ്റപ്പെടുത്തി.