ഹൈദരാബാദ്: അണ്ടര്‍ 23 ദക്ഷിണ മേഖലാ ദേശീയ വനിതാ ടി20 പോരാട്ടത്തില്‍ കേരളത്തിന് വിജയം. തമിഴ്‌നാടിനെ 119 റണ്‍സിന് കീഴടക്കിയാണ് കേരളം ഉജ്ജ്വല വിജയം സ്വന്തമാക്കിയത്. ആദ്യം ബാറ്റ് ചെയ്ത കേരളം നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 160 റണ്‍സെന്ന മികച്ച സ്‌കോര്‍ പടുത്തുയര്‍ത്തിയപ്പോള്‍ തമിഴ്‌നാടിന്റെ പോരാട്ടം 19.5 ഓവറില്‍ വെറും 41 റണ്‍സില്‍ അവസാനിപ്പിച്ചാണ് കേരളത്തിന്റെ വനിതകള്‍ വിജയം പിടിച്ചത്.
കേരളത്തിനായി ജിപ്‌സ ജോസഫ്, കീര്‍ത്തി ജെയിംസ് എന്നിവര്‍ രണ്ട് വീതം വിക്കറ്റുകളും മിന്നു മണി, അനീന മാത്യൂസ് എന്നിവര്‍ ഓരോ വിക്കറ്റും വീഴ്ത്തി. നാല് തമിഴ്‌നാട് താരങ്ങളെ മികച്ച ഫീല്‍ഡിങിലൂടെ റൗണ്ണൗട്ടാക്കി കേരള താരങ്ങള്‍ കളിയില്‍ പിടിമുറുക്കുകയായിരുന്നു. തമിഴ്‌നാടിന്റെ ഒരു താരത്തിനും ക്രീസില്‍ നിലയുറപ്പിച്ച് കളിക്കാന്‍ സാധിക്കാതെ പോയി. ഏഴ് വീതം റണ്‍സെടുത്ത അപര്‍ണ, അരുണ ദേവി എന്നിവരാണ് ടോപ് സ്‌കോറര്‍മാര്‍. നേരത്തെ 35 പന്തില്‍ 58 റണ്‍സെടുത്ത് മിന്നു മണിയും 21 പന്തില്‍ 35 റണ്‍സുമായി ക്യാപ്റ്റന്‍ സജനയും പുറത്താകാതെ നിന്നാണ് കേരളത്തിനെ പൊരുതാവുന്ന സ്‌കോറിലെത്തിച്ചത്. അശ്വതി ബാബു 25 റണ്‍സെടുത്തു.