തിരുവനന്തപുരം: സംസ്ഥാനത്തെ രാഷ്ട്രീയ കേസുകളില്‍ കേന്ദ്ര അന്വേഷണ ഏജന്‍സിയായ സി.ബി.ഐ ഇരട്ടത്താപ്പ് നയമാണ് സ്വീകരിക്കുന്നതെന്ന് മുഖ്യമന്ത്രി പിണറായി വിജയന്‍.
സി.ബി.ഐ നിലപാടുകള്‍ പക്ഷപാതപരമാണെന്നാണ് പൊതുവിലുള്ള വിലയിരുത്തല്‍. ആര്‍.എസ്.എസ് ബി.ജെ.പി പ്രവര്‍ത്തകര്‍ പ്രതികളായ ഏഴ് കേസുകള്‍ സി.ബി.ഐക്ക് വിടണമെന്നാവശ്യപ്പെട്ടുള്ള ഹരജി ഹൈക്കോടതിയില്‍വന്നു. കോടതി ആവശ്യപ്പെടാതെതന്നെ കേസ് ഏറ്റെടുക്കാന്‍ സി.ബി.ഐ താല്‍പര്യം പ്രകടിപ്പിച്ചു. അതിനേക്കാള്‍ പ്രമാദമായതും സര്‍ക്കാര്‍ കൈമാറിയതുമായ പല കേസുകളിലും കോടതികള്‍ അഭിപ്രായം തേടുമ്പോള്‍, കേസുകളുടെ ബാഹുല്യവും സി.ബി.ഐ ഏറ്റെടുക്കേണ്ടുന്ന പ്രാധാന്യവുമില്ലെന്ന കാരണം പറഞ്ഞ് ഒഴിഞ്ഞുമാറുന്ന നിലപാടാണ് സ്വീകരിക്കുന്നതെന്നും മുഖ്യമന്ത്രി നിയമസഭയില്‍ വ്യക്തമാക്കി.