റാഞ്ചി: കാലിത്തീറ്റ കുംഭകോണകേസില്‍ ആര്‍.ജെ.ഡി നേതാവ് ലാലു പ്രസാദ് യാദവിന് ഏഴു വര്‍ഷം തടവ്. റാഞ്ചി പ്രത്യേക സി.ബി.ഐ കോടതിയാണ് ശിക്ഷ വിധിച്ചത്. ദുംക ട്രഷറിയില്‍ നിന്ന് 3.1 കോടി രൂപ പിന്‍വലിച്ചെന്നാണ് കേസ്.ഇത് നാലാം കാലിത്തീറ്റ കുംഭകോണകേസിലാണ് ലാലുവിന് ശിക്ഷ വിധിക്കുന്നത്. നാലു കേസില്‍ നിന്നായി 21 വര്‍ഷം തടവാണ് ഇതുവരെയായി ലാലുവിന് ലഭിച്ചത്.

കേസില്‍ ബിഹാര്‍ മുന്‍മുഖ്യമന്ത്രിയായിരുന്ന ജഗന്നാഥ് മിശ്രയെ കോടതി വെറുതേ വിട്ടിരുന്നു. മിശ്ര ഉള്‍പ്പെട്ടെ അഞ്ചു പ്രതികളെയാണ് വെറുതേ വിട്ടത്. ലാലുവിന് മുറമേ ജഗന്നാഥ് മിശ്ര അടക്കം 31 പ്രതികള്‍ക്കെതിരേ കേസെടുത്തിരുന്നു. ആറു കാലിത്തീറ്റ കേസുകളില്‍ നേരത്തെ മൂന്നെണ്ണത്തില്‍ വിധി പ്രഖ്യാപിച്ചിരുന്നു. ആദ്യ കേസില്‍ അഞ്ചര വര്‍ഷവും രണ്ടാം കേസില്‍ മൂന്നര വര്‍ഷവും മൂന്നാം കേസില്‍ അഞ്ചു വര്‍ഷവും തടവു ശിക്ഷകളാണ് ലാലുവിന് ലഭിച്ചത്.

1995-96ല്‍ ദുംക ട്രഷറിയില്‍ വ്യാജ ബില്ലുകള്‍ ഹാജരാക്കി കോടികള്‍ തട്ടിയെന്നാരാപിച്ചാണ് 48 പേര്‍ക്കെതിരേ കുറ്റപത്രം തയ്യാറാക്കിയത്. വിചാരണ സമയത്ത് 14 പേര്‍ മരിക്കുകയും രണ്ടു പേര്‍ മാപ്പു സാക്ഷികളാവുകയും ചെയ്തിരുന്നു.