ഗാന്ധിനഗര്‍: മെഡിക്കല്‍ കോളജുകളില്‍ പി.ജി കോഴ്‌സുകളുടെ അംഗീകാരം നഷ്ടമാകുന്നത് സര്‍ക്കാരിന്റെ അനാസ്ഥയാണെന്ന് ഡോക്ടര്‍മാര്‍. ഇത്തരത്തില്‍ അനേകം വിദ്യാര്‍ഥികളുടെ ഭാവി അവതാളത്തിലാക്കുന്ന സര്‍ക്കാര്‍ അനാസ്ഥയ്‌ക്കെതിരേ ജൂനിയര്‍ ഡോക്ടര്‍മാര്‍ പ്രക്ഷോഭത്തിനൊരുങ്ങുന്നു. ഐ.എം.സിയുടെ നിര്‍ദേശ പ്രകാരം പഠന സൗക്കര്യം ഒരുക്കിയില്ലെങ്കില്‍ മെഡിക്കല്‍ പിജി വിദ്യാര്‍ത്ഥികളുടെ  ഭാവി അവതാളത്തിലാകുമെന്ന ആശങ്കയാണ് വിദ്യാര്‍ഥികളെ പ്രക്ഷോഭത്തിലേക്ക് നയിക്കുന്നത്.
സംസ്ഥാനത്തെ സര്‍ക്കാര്‍ മെഡിക്കല്‍ കോളജുകളിലെ പി.ജി സീറ്റുകളുടെ അംഗീകാരം നഷ്ടപ്പെടുന്നതില്‍  പ്രതിഷേധിച്ച് ജൂനിയര്‍ ഡോക്ടര്‍മാര്‍ തയാറെടുക്കുന്നു.
2013മുതല്‍ ഇന്ത്യന്‍ മെഡിക്കല്‍ കൗണ്‍സില്‍ നിര്‍ദേശിക്കുന്ന തരത്തിലുള്ള ചികില്‍സ ഉകരണങ്ങളും മറ്റു  പഠന സംവിധാനങ്ങളുടേയും അപര്യാപ്തതമൂലമാണ് അംഗീകാരം നഷ്ടമായത്. കഴിഞ്ഞ സര്‍ക്കാരിന്റെ കാലത്ത് ജൂനിയര്‍ ഡോക്ടര്‍മാര്‍ ഇതു സംബന്ധിച്ച് നിരവധി പരാതികള്‍ സമര്‍പ്പിച്ചെങ്കിലും പ്രയോജനം ലഭിച്ചില്ല.
തിരുവനന്തപുരം ആര്‍.സി.സി കോട്ടയം, തൃശൂര്‍, ആലപ്പുഴ, കോഴിക്കോട് എന്നി മെഡിക്കല്‍ കോളജുകളിലായ് മെഡിസിന്‍, സര്‍ജറി, ഫോറനന്‍സിക്ക് മെഡിസിന്‍, ഫിസിയോളജി, മൈക്രോബയോളജി, പ്രിവന്റീവ് മെഡിസിന്‍, ത്വക്ക് രോഗം, ഫിസിക്കല്‍ മെഡിസിന്‍, അനസ്‌തേഷ്യ, അസ്തിരോഗം, റേഡിയോഡൈഗ്‌നോസീസ്, ന്യൂറോളജി എന്നി വിഭാഗങ്ങള്‍ക്കും   കൂടാതെ സൂപ്പര്‍ സ്‌പെഷ്യാലിറ്റിയായ ന്യൂറോജി വിഭാഗത്തിനുമാണ് അംഗീകാരമാണ് നഷ്ടമായിരിക്കുന്നത്.
സംസ്ഥാനത്ത് ഒരു വര്‍ഷം 208 പി.ജി ഡോക്ടര്‍മാര്‍ വീതം മുന്നു വര്‍ഷം 600ഓളം പി.ജിക്കാര്‍ക്ക് ഐ.എം.സിയുടെ അംഗീകാരം ലഭിക്കാതെ പോകുന്നത്.816 പി.ജി സീറ്റുകളാണ് സംസ്ഥാനത്തെ സര്‍ക്കാര്‍ മെഡിക്കല്‍ കോളജുകളിലുള്ളത്. കോട്ടയം മെഡിക്കല്‍ കോളജിലെ മെഡിസിന്‍ വിഭാഗത്തില്‍ 10 പി.ജി സീറ്റി ഉണ്ടായിരുന്നത് 14 ആയി ഉയര്‍ത്തിയെങ്കിലും നാളിതുവരെ  ഐ.എം.സിയുടെ അംഗീകാരം ലഭിച്ചിട്ടില്ല. അസിസ്റ്റന്റ് പ്രൊഫസര്‍മാര്‍ ,സീനിയര്‍ റസിഡന്റ് ഡോക്ടര്‍മാര്‍ എന്നിവരുടെ  ഒഴിവുകള്‍ അധ്യാപക ഡോക്ടര്‍മാരുടെ നിബന്ധനകള്‍ പാലിക്കാത്ത സ്ഥാനക്കയറ്റങ്ങള്‍ എം.ആര്‍.ഐ പോലുള്ള ആധുനിക സംവിധാനങ്ങളുടെ കുറവ്, ഐ.സി.യു, വാര്‍ഡ് എന്നിവിടങ്ങളിലെ ബഡുകളുടെ കുറവ് എന്നിവയാണ് അംഗികാരം നഷ്ടമാകാന്‍ കാരണമെന്ന് മെഡിക്കല്‍ കൗണ്‍സില്‍ ചൂണ്ടിക്കാട്ടുന്നു.