പാലാ : കോടതി ആവശ്യങ്ങള്‍ക്കും വിവിധ സര്‍ട്ടിഫിക്കറ്റുകള്‍ തയാറാക്കുന്നിനും മറ്റുമായി ഉപയോഗിക്കുന്ന മുദ്രപത്രങ്ങള്‍ പാലായില്‍ കിട്ടാക്കനിയാകുന്നു. താലൂക്ക് ഓഫീസുകളിലും മുനിസിപ്പാലിറ്റികളിലും വിവിധ ആവശ്യങ്ങള്‍ക്ക് എത്തിക്കണമെന്ന് നിര്‍ദ്ദേശിക്കുന്ന മുദ്രപത്രങ്ങളും കോര്‍ട്ട് ഫീ, റവന്യൂ സ്റ്റാമ്പുകളും കിട്ടാതെ ജനം വലയുന്നു. കിലോമീറ്ററുകള്‍ നടന്ന് വിവിധ സ്ഥാപനങ്ങളിലും ആധാരം എഴുത്താഫീസുകളും കയറിയിറങ്ങിയാലും ഇവ കിട്ടാനില്ലാത്ത അവസ്ഥയാണ്.
20, 50, 100, 200 രൂപയുടെ മൂല്യമുള്ള മുദ്രപത്രങ്ങള്‍ക്കാണ് ആവശ്യക്കാരേറെയും. എന്നാല്‍ ഇവയാണ് കിട്ടാനില്ലാത്തതും. ജനമരണ സര്‍ട്ടിഫിക്കറ്റുകള്‍ക്കും ബാങ്ക് ലോണുകള്‍ക്കും മുദ്രപത്രങ്ങള്‍ അത്യാവശ്യമാണ്.
മുദ്രപത്രങ്ങളും സ്റ്റാമ്പുകളും ആവശ്യത്തിന് ലഭ്യമാക്കി ജനങ്ങളുടെ ദുരിതത്തിന് അറുതിവരുത്തണമെന്ന് പാലാ പൗരസമിതി യോഗം ചേര്‍ന്നാവശ്യപ്പെട്ടു. പി. പോത്തന്‍, സേബി വെള്ളരിങ്ങാട്ട്, ജെയിംസ് ചാലില്‍, മൈക്കിള്‍ തുടങ്ങിയവര്‍ സംസാരിച്ചു.