ലണ്ടന്‍: അന്താരാഷ്ട സൗഹൃദ ഫുട്‌ബോളില്‍ പോര്‍ച്ചുഗലിനെതിരേ ഇംഗ്ലണ്ടിന് ജയം. ക്രിസ് സ്മാളിങ് സ്‌കോര്‍ ചെയ്തപ്പോള്‍ എതിരില്ലാത്ത ഒരു ഗോളിന്റെ ജയമാണ് ഇംഗ്ലണ്ട് സ്വന്തമാക്കിയത്.
35ാം മിനുട്ടില്‍ ബ്രൂണോ ആല്‍വസിന് ചുവപ്പു കാര്‍ഡ് കണ്ടതോടെ പത്തു പേരായി ചുരുങ്ങിയാണ് പോര്‍ച്ചുഗല്‍ കളിച്ചത്. എന്നാല്‍ ഈ ആനുകൂല്യം മുതലെടുക്കാന്‍ ഇംഗ്ലണ്ടിന് സാധിച്ചില്ല. മുന്‍ നിരയില്‍ വെയ്ന്‍ റൂണി, ഹാരി കെയ്ന്‍, ജാമി വാര്‍ഡി എന്നിവര്‍ ഉണ്ടായിട്ടും ടീമിന് ഗോള്‍ സ്‌കോര്‍ ചെയ്യാന്‍ സാധിച്ചില്ല. ഗോള്‍രഹിതമായ ആദ്യ പകുതിക്ക് ശേഷം മുന്നേറാനുള്ള ഇംഗ്ലണ്ടിന്റെ പല ശ്രമങ്ങളും പരാജയപ്പെട്ടു. മത്സരം സമനിലയില്‍ അവസാനിക്കുമെന്ന് കരുതിയിരിക്കെ 86ാം മിനുട്ടില്‍ റഹീം സ്റ്റെര്‍ലിങ് നല്‍കിയ ക്രോസ് മുതലെടുത്ത് സ്മാളിങ് ടീമിനെ വിജയത്തിലെത്തിക്കുകയായിരുന്നു.