തിരുവനന്തപുരം: കേന്ദ്ര സര്‍ക്കാരിന്റെ ഔദാര്യത്തിനു കാത്തുനില്‍ക്കാന്‍ സംസ്ഥാനങ്ങള്‍ക്കാവില്ലെന്ന് പുതുച്ചേരി മുഖ്യമന്ത്രി വി. നാരായണസ്വാമി. പതിനഞ്ചാം ധനകാര്യ കമ്മിഷന്റെ പരിഗണനാവിഷയങ്ങള്‍ സംസ്ഥാനങ്ങളുടെ വരുമാനത്തെ ഗുരുതരമായി ബാധിക്കുന്നതാണെന്നും ദക്ഷിണേന്ത്യന്‍ സംസ്ഥാനങ്ങളുടെ യോഗത്തിനെത്തിയ നാരായണസ്വാമി മാധ്യമങ്ങളോടു പറഞ്ഞു.
സഹകരണ ഫെഡറലിസത്തെക്കുറിച്ചു വാചാലനാകുന്ന പ്രധാനമന്ത്രി നരേന്ദ്രമോദി സംസ്ഥാനങ്ങള്‍ക്കു മേല്‍ ഏകാധിപത്യ വാഴ്ച അടിച്ചേല്‍പിക്കുകയാണ്. സംസ്ഥാനങ്ങളുടെ അധികാരങ്ങള്‍ എടുത്തുമാറ്റി രാജ്യത്തെ ഫെഡറല്‍ സംവിധാനം പൊളിച്ചെഴുതാനാണ് കേന്ദ്രസര്‍ക്കാര്‍ ശ്രമിക്കുന്നത്. മികച്ച പ്രകടനം കാഴ്ചവയ്ക്കുന്ന സംസ്ഥാനങ്ങളെ ദ്രോഹിക്കുകയാണ് കേന്ദ്രം. മോശം ഭരണമുള്ള സംസ്ഥാനങ്ങള്‍ക്കാണ് മുന്‍ഗണന നല്‍കുന്നത്. സംസ്ഥാനങ്ങളോട് ആജ്ഞാപിക്കാന്‍ കേന്ദ്രത്തിന് എന്ത് അധികാരമാണുള്ളത്? ജനങ്ങളുടെ ആവശ്യം അറിയുന്നത് സംസ്ഥാന സര്‍ക്കാരുകളാണ്. അതനുസരിച്ചാണ് സംസ്ഥാനങ്ങള്‍ ക്ഷേമപദ്ധതികള്‍ നടപ്പാക്കുന്നത്. അതിനുള്ള സാമ്പത്തിക അധികാരം സംസ്ഥാനങ്ങള്‍ക്ക് ഉണ്ടാവണം.
അവികസിത സംസ്ഥാനങ്ങള്‍ വികസിക്കണമെന്ന് മോദി പറയുന്നതില്‍ തെറ്റില്ല. എന്നാല്‍ ആ വികസനം വികസ്വര സംസ്ഥാനങ്ങളുടെ ചെലവിലാകരുത്. ജി.എസ്.ടി നടപ്പായതോടെ ഉപഭോക്തൃ സംസ്ഥാനങ്ങള്‍ക്ക് വരുമാനം വര്‍ധിക്കുകയാണ് വേണ്ടത്.
എന്നാല്‍ ആ ഗണത്തില്‍ പെടുന്ന പുതുച്ചേരിക്കും വരുമാനം കുറയുകയാണ്. ജി.എസ്.ടി സംബന്ധിച്ച് ഒട്ടേറെ ആശയക്കുഴപ്പങ്ങള്‍ നിലനില്‍ക്കുന്നുണ്ട്. ദക്ഷിണേന്ത്യന്‍ സംസ്ഥാനങ്ങളുടെ ഒത്തുചേരലിന് അടിസ്ഥാനം രാഷ്ട്രീയമല്ലെന്നും വിഷയങ്ങളാണെന്നും ചോദ്യത്തിനു മറുപടിയായി അദ്ദേഹം പറഞ്ഞു. തമിഴ്‌നാടും തെലങ്കാനയും യോഗത്തിനു വരാത്തതിന്റെ കാരണം അവരാണ് പറയേണ്ടതെന്നും അദ്ദേഹം കൂട്ടിച്ചേര്‍ത്തു.