ജിദ്ദ: വര്‍ധിച്ചുവരുന്ന സൈബര്‍ കുറ്റകൃത്യങ്ങള്‍ തടയാന്‍ ഇന്ത്യയും സഊദിയും സഹകരിക്കും. ഈ മേഖല ശക്തമാക്കാനുള്ള ധാരണാ പത്രം ഒപ്പുവയ്ക്കാന്‍ സഊദി മന്ത്രിസഭ അംഗീകാരം നല്‍കി. കരാര്‍ ഒപ്പുവയ്ക്കുന്നതോടെ കുറ്റവാളികളെ ഇരു രാജ്യങ്ങളും കൈമാറും. നേരത്തേ നടത്തിയ ചര്‍ച്ചകളുടെ അടിസ്ഥാനത്തിലാണ് തീരുമാനം.
സല്‍മാന്‍ രാജാവിന്റെ അധ്യക്ഷതയില്‍ അല്‍യമാമ കൊട്ടാരത്തില്‍ചേര്‍ന്ന മന്ത്രിസഭ യോഗമാണ് സഹകരണത്തിനു തീരുമാനമെടുത്തത്. ഇന്ത്യയുമായി വിഷയത്തില്‍ ചര്‍ച്ച നടത്തുന്നതിനും ധാരണാ പത്രത്തില്‍ ഒപ്പുവയ്ക്കുന്നതിനും ആഭ്യന്തര മന്ത്രി സഊദ് ബിന്‍ നായിഫ് ബിന്‍ അബ്ദുല്‍ അസീസിനെ മന്ത്രിസഭ ചുമതലപ്പെടുത്തി.
സൈബര്‍ ലോകത്തിന്റെ വികാസത്തിനനുസരിച്ച് ഈ രംഗത്തെ കുറ്റകൃത്യങ്ങളും വര്‍ധിച്ചുവരുന്നുണ്ടെന്ന് മന്ത്രിസഭ വിലയിരുത്തി. ഈ സാഹചര്യത്തിലാണ് രാജ്യങ്ങള്‍ തമ്മിലുള്ള സഹകരണം ശക്തമാക്കാനുള്ള തീരുമാനം.