കണ്ണൂര്‍: വിഷുത്തിരക്കില്‍ പതിനായിരങ്ങള്‍ നഗരത്തിലെത്തുമ്പോഴും പൊതുസ്ഥലത്തെ മാലിന്യക്കൂമ്പാരം കോര്‍പറേഷന് നാണക്കേടാകുന്നു. കണ്ണൂരിലെ വിവിധ പ്രദേശത്ത് മാലിന്യങ്ങള്‍ കുന്നുകൂടുമ്പോഴും അനങ്ങാപ്പാറ നയമാണ് കോര്‍പറേഷന്‍ സ്വീകരിക്കുന്നതെന്നാണ് ആക്ഷേപം. നിരവധി ആളുകള്‍ എത്തുന്നതും വാഹനങ്ങള്‍ പാര്‍ക്ക് ചെയ്യുന്നതുമായ കണ്ണൂര്‍ ടൗണ്‍ സ്‌ക്വയറിലാണ് മാലിന്യം കുന്നുകൂടിയിരിക്കുന്നത്.
ചായ കുടിച്ച് ഉപേക്ഷിച്ച പേപ്പര്‍ ഗ്ലാസുകളും ബത്തക്കയുടെ അവശിഷ്ടങ്ങളും മറ്റ് ഭക്ഷണ പദാര്‍ഥങ്ങളുമാണ് ഇവിടെ വ്യാപകമായി തള്ളുന്നത്. കൂടാതെ പ്ലാസ്റ്റിക് മാലിന്യവും കുന്നുകൂടുന്നുണ്ട്. നിരവധി തൊഴിലാളികളാണ് കോര്‍പറേഷനിലെ മാലിന്യം നീക്കം ചെയ്യുന്നതിനുള്ളത്. കോര്‍പറേഷന്‍ ആരോഗ്യ സ്റ്റാന്‍ഡിങ് കമ്മിറ്റിക്കാണ് മാലിന്യനീക്കം ചെയ്യുന്നതിന്റെ ചുമതല. എന്നാല്‍ വിഷുത്തിരക്കായിട്ടും മാലിന്യം നീക്കം ചെയ്യാത്തതിനെതിരേ ജനങ്ങളില്‍ കടുത്ത പ്രതിഷേധമാണ് ഉയരുന്നത്.