കണ്ണൂര്‍: പയ്യന്നൂരിലെ സി.പി.എം ശക്തികേന്ദ്രത്തില്‍ ദലിത് അവഗണനക്കെതിരേ പ്രതിഷേധിച്ച് ശ്രദ്ധേയയായ ചിത്രലേഖയുടെ കണ്ണാടിപ്പറമ്പിലെ നിര്‍മാണത്തിലിരിക്കുന്ന വീടിനു മുന്നില്‍ നായയുടെ ജഡം തള്ളിയതായി ആക്ഷേപം. ഇന്നലെ വൈകിട്ട് ആറരയോടെ വീടിന്റെ സണ്‍ഷേഡിന് വെള്ളമൊഴിക്കാന്‍ ചിത്രലേഖ എത്തിയപ്പോള്‍ വീടിനു മുന്‍വശത്താണ് നായയുടെ ജഡം തള്ളിയതായി കണ്ടത്. നായയുടെ മുഖം വികൃതമാക്കുകയും കഴുത്തില്‍ കയര്‍ കെട്ടിയ നിലയിലുമാണ്. കഴിഞ്ഞ ദിവസം പി. ജയരാജന്‍ പ്രസംഗത്തില്‍ ചിത്രലേഖക്കെതിരേ ആക്ഷേപങ്ങള്‍ ഉന്നയിച്ചിരുന്നതായും അതിന് മറുപടി നല്‍കിയതിനുള്ള പ്രതികാരമായി സി.പി.എം പ്രവര്‍ത്തകര്‍ നായയെ തല്ലിക്കൊന്ന് വീടിനു മുന്നില്‍ കൊണ്ടിട്ടതാണെന്ന് സംശയിക്കുന്നതായും ചിത്രലേഖ പറഞ്ഞു. അധികകാലം ജീവിച്ചിരിക്കാനാകുമെന്ന് എനിക്ക് ഉറപ്പില്ലെന്നും അതിന്റെ മുന്നറിയിപ്പാണ് ഇതെന്നു സംശയിക്കുന്നതായും ദേശീയ പട്ടികജാതി കമ്മിഷന്‍, മനുഷ്യാവകാശ കമ്മിഷന്‍, എസ്.പി എന്നിവര്‍ക്ക് പരാതി നല്‍കുമെന്നും ചിത്രലേഖ അറിയിച്ചു.