കട്ടപ്പന: കഞ്ചാവു കടത്തിയ തമിഴ്‌നാട് സ്വദേശിയെ നെടുങ്കണ്ടം റേഞ്ച് എക്‌സൈസ് സംഘം തന്ത്രപരമായി പിടികൂടി. രാമക്കല്‍മേട് വനത്തിലൂടെ മൂന്നുകിലോ കഞ്ചാവുമായി എത്തിയ തമിഴ്‌നാട് സ്വദേശി കുമരേശന്‍ (29)നെയാണ് നെടുങ്കണ്ടം മെഡിക്കല്‍ ട്രസ്റ്റ് ഹോസ്പിറ്റലിനു സമീപം പിടികൂടിയത്.
മുന്‍പ് നിരവധി തവണ തമിഴ്‌നാട്ടില്‍നിന്നും രാമക്കല്‍മേട് വനത്തിലൂടെ കാല്‍നടയായി കഞ്ചാവ് കടത്തിവന്നിരുന്ന കുമരേശനുമായി കഞ്ചാവ് ആവശ്യക്കാരാണെന്ന വ്യാജേന എക്‌സൈസ് ഉദ്യോഗസ്ഥര്‍ ഫോണില്‍ ബന്ധപ്പെടുകയായിരുന്നു.
എറണാകുളം സ്വദേശികള്‍ക്ക് നല്‍കുന്നതിനായുള്ള മൂന്നുകിലോ കഞ്ചാവ് 25000 രൂപ വിലയില്‍ വാങ്ങികൊള്ളാമെന്നുപറഞ്ഞാണ് കുമരേശനെ നെടുങ്കണ്ടത്ത് എത്തിച്ചത്. ഉടുമ്പന്‍ചോല റേഞ്ച് എക്‌സൈസ് ഇന്‍സ്‌പെക്ടര്‍ എസ്. ഷാജിയുടെ നേതൃത്വത്തിലാണ് കഞ്ചാവ് പിടികൂടിയത്. സിവില്‍ എക്‌സൈസ് ഉദ്യേഗസ്ഥരായ ആസിഫ് അലി, ജോഫിന്‍, ശശികുമാര്‍, ഗോകുല്‍, ഷിജു ശശീന്ദ്രന്‍, ജോഷി രാധാകൃഷ്ണന്‍, സേവ്യര്‍ എന്നിവര്‍ റെയ്ഡിനു നേത്യത്വം നല്‍കി.