HOME
DETAILS

തിരിച്ചറിയല്‍ കാര്‍ഡ് ധരിക്കുന്നില്ല: സര്‍ക്കാര്‍ ജീവനക്കാര്‍ നിയമം കാറ്റില്‍ പറത്തുന്നു

  
backup
April 20 2018 | 04:04 AM

%e0%b4%a4%e0%b4%bf%e0%b4%b0%e0%b4%bf%e0%b4%9a%e0%b5%8d%e0%b4%9a%e0%b4%b1%e0%b4%bf%e0%b4%af%e0%b4%b2%e0%b5%8d%e2%80%8d-%e0%b4%95%e0%b4%be%e0%b4%b0%e0%b5%8d%e2%80%8d%e0%b4%a1%e0%b5%8d-%e0%b4%a7%e0%b4%b0

 

 


കാക്കനാട്: സര്‍ക്കാര്‍ ജീവനക്കാര്‍ ജോലി സമയങ്ങളില്‍ തിരിച്ചറിയല്‍ കാര്‍ഡ് ധരിക്കണമെന്ന ഉത്തരവ് കടലാസിലൊതുങ്ങുന്നു.
സിവില്‍ സ്റ്റേഷന്‍ അടക്കം ജില്ലാ കേന്ദ്രത്തിലെ പല ഓഫിസുകളിലും ഈ നിയമം പാലിക്കപ്പെടുന്നില്ല.
എല്ലാ സര്‍ക്കാര്‍ ജീവനക്കാര്‍ക്കും അതത് വകുപ്പ് വഴി തിരിച്ചറിയല്‍ കാര്‍ഡ് നല്‍കുന്നുണ്ട്. എന്നാല്‍ പലരും ഒരിക്കലും ഉപയോഗിക്കുന്നില്ലെന്നതാണ് യാഥാര്‍ഥ്യം. സര്‍ക്കാര്‍ ഓഫിസുകളിലെ അഴിമതിയും ആള്‍മാറാട്ടവും തടയുന്നതിനും ജീവനക്കാരെ പൊതുജനം തിരിച്ചറിയുന്നതിനുമാണ് നെയിം ബോര്‍ഡ് പ്രദര്‍ശിപ്പിക്കാന്‍ സര്‍ക്കാര്‍ തീരുമാനിച്ചത്.
ഇപ്പോള്‍ ആര്‍.ടി.ഒ, പൊലിസ്, കലക്ടറേറ്റ് ജീവനക്കാര്‍ മാത്രമാണ് ഡ്യൂട്ടി സമയത്ത് തിരിച്ചറിയല്‍ കാര്‍ഡ് ഉപയോഗിക്കുന്നത്.
അധ്യാപകരും മറ്റു സിവില്‍ സ്റ്റേഷനിലെ ജീവനക്കാരും ഇതുവരെ ഉപയോഗിക്കാന്‍ തയ്യാറായിട്ടില്ല. ഉദ്യോഗസ്ഥ ഭരണപരിഷ്‌കാര വകുപ്പ് 2015ലും 2016ലും ഇറക്കിയ ഉത്തരവ് പാലിക്കാതെയാണ് മിക്ക ഉദ്യോഗസ്ഥരും ജോലിചെയ്യുന്നത്. ജീവനക്കാര്‍ക്ക് തിരിച്ചറിയല്‍ കാര്‍ഡ് നല്‍കിയിട്ടുണ്ടെങ്കിലും മിക്കവരും ധരിക്കുന്നില്ലെന്നതാണ് യാഥാര്‍ഥ്യം.
അതത് ഓഫിസ് മേധാവികള്‍ ഉറപ്പുവരുത്തണമെന്നും ജില്ലതലങ്ങളില്‍ കലക്ടര്‍മാര്‍ നിയമം പാലിക്കപ്പെടുന്നത് ഉറപ്പുവരുത്തണമെന്നും ഉത്തരവില്‍ പറയുന്നുണ്ട്. കൈക്കൂലി ആവശ്യപ്പടുന്നവരെയും മോശമായി പെരുമാറുന്നവരെയും തെറ്റായ വിവരങ്ങള്‍ നല്‍കുന്നവരേയും പൊതുജനങ്ങള്‍ക്ക് എളുപ്പം തിരിച്ചറിയാന്‍ പറ്റുമെന്നതിനാലാണ് പല ഉദ്യോഗസ്ഥരും കാര്‍ഡ് ധരിക്കാത്തതെന്ന് ആക്ഷേപമുണ്ട്.
രജിസ്ട്രാര്‍ ഓഫിസുകളിലും റവന്യൂ വകുപ്പുകളിലും ഭൂരിഭാഗം ജീവനക്കാരും കാര്‍ഡ് ധരിക്കാതെയാണ് ജോലിചെയ്യുന്നത്. ഉദ്യോഗസ്ഥ ഭരണപരിഷ്‌കരണ വകുപ്പ് പ്രിന്‍സിപ്പല്‍ സെക്രട്ടറിയുടെ ഉത്തരവ് പല ഉദ്യോഗസ്ഥരും പാലിക്കുന്നുമില്ല.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."