കിഴിശ്ശേരി: കൊരൂര് വിഭാഗം പ്രസ്ഥാനത്തിൻ്റെ പീഡനം സഹിക്കാതെ വിഷം കഴിച്ച് ആത്മഹത്യക്കു ശ്രമിച്ച യുവാവ് ആശുപത്രിയിൽ. വയനാട് സ്വദേശി മുജീബി (42) നെയാണ് കിഴിശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചത്. ഇന്നലെ വൈകീട്ട് 7.10ന് കിഴിശ്ശേരി ടൗണിൽ വീണുകിടക്കുന്ന നിലയിലാണ് യുവാവിനെ കണ്ടത്. നാട്ടുകാർ ചേർന്ന് ആശുപത്രിയിൽ എത്തിക്കുകയായിരുന്നു. സംഘടനയുടെ ക്ലാസിൽ പങ്കെടുക്കാത്തതിനാണ് തന്നെ സംഘടനയിൽനിന്ന് പുറത്താക്കിയതെന്ന് മുജീബ് പറഞ്ഞു. പുറത്തുപോയാൽ പിന്നീട് ബന്ധുക്കളോടുപോലും മിണ്ടാനോ ബന്ധപ്പെടാനോ പാടില്ലെന്ന് സംഘടനാ നിയമമുണ്ട്. ഇതോടെ ഭാര്യയും മക്കളും തന്നോടു മിണ്ടാതായി. വീട്ടിലേക്കു കയറാൻപറ്റാത്ത സ്ഥിതിയായി. സമൂഹത്തിൽനിന്നും ഒറ്റപ്പെടുത്തി. ഇനി തനിക്കു പോകാൻ ഒരിടവുമില്ല. ഉമ്മയോടും ഭാര്യയോടുംപോലും മിണ്ടാൻ പറ്റില്ല. മിണ്ടിയാൽ അവരെയും സംഘടനയിൽനിന്ന് പുറത്താക്കും. ഇനി മരിക്കുകയല്ലാതെ മറ്റു വഴിയില്ലെന്നും മുജീബ് പറഞ്ഞു. 

ALSO READ: ഭ്രഷ്‌ട് കൽപ്പിച്ച് കൊരൂര് ത്വരീഖത്ത് നേതൃത്വം; മാതാവിനെ കാണാനാകാതെ സഹോദരിമാർ; മരിച്ചാൽ സംസ്കരിക്കില്ലെന്ന് ഭീഷണി

കൊണ്ടോട്ടി പൊലിസെത്തി മുജീബിൻ്റെ മൊഴി രേഖപ്പെടുത്തി. ഇയാൾ അമിതമായി ഗുളിക കഴിച്ചതായും പോക്കറ്റിൽ എലിവിഷം ഉണ്ടായിരുന്നതായും ആശുപത്രി അധികൃതർ പറഞ്ഞു. കഴിഞ്ഞദിവസം കിഴിശ്ശേരി സ്വദേശികളായ കല്ലൻ വീട്ടിൽ ലുബ്ന, ഷിബ് ല, ലുബ്നയുടെ ഭർത്താവ് വയനാട് സ്വദേശി റിയാസ് എന്നിവർ കടുത്ത മനുഷ്യാവകാശ ലംഘനത്തിന് ഇരകളാകുന്നതായി കാണിച്ച് കൊരൂര് നേതൃത്വത്തിനെതിരേ പരാതി നൽകിയിരുന്നു. കൊടുവള്ളി കിഴക്കോത്ത് പുത്തൻവീട്ടിൽ ഷാഹുൽ ഹമീദ് എന്നയാൾ നേതൃത്വം നൽകുന്ന കൊരൂര് ത്വരീഖത്ത് എന്ന പ്രസ്ഥാനത്തിൽ തങ്ങൾ പ്രവർത്തിച്ചിരുന്നതായി ഇവർ പറയുന്നു. മൂന്നു വർഷം മുൻപാണ് റിയാസും ഭാര്യ ലുബ്നയും പ്രസ്ഥാനവുമായി ബന്ധം പിരിഞ്ഞത്. മൂന്നാഴ്ച മുൻപ് ഷിബ് ലയും പ്രസ്ഥാനബന്ധം അവസാനിപ്പിച്ചു. ഇതോടെ ഗുരുതരമായ സാമൂഹ്യ, മാനസിക പീഡനവും ഒറ്റപ്പെടുത്തലും നേരിടേണ്ടിവരികയാണെന്ന് ഇവർ പറഞ്ഞിരുന്നു. ഇതിനു പിന്നാലെയാണ് സമാന ആരോപണവുമായി വയനാട് സ്വദേശിയായ മുജീബ് ആത്മഹത്യയ്്ക്ക് ശ്രമിച്ചത്.