കോഴിക്കോട്: പാലക്കാട് ഡിവിഷന് കീഴിലെ റെയിൽവേ സ്റ്റേഷനുകളിൽ ടിക്കറ്റ് എടുക്കാൻ ഡിജിറ്റൽ പെയ്‌മെന്റ് മാത്രമാക്കിയത് യാത്രക്കാരെ വെട്ടിലാക്കുന്നു. ഓൺലൈനായി പണമടച്ചില്ലെങ്കിൽ ടിക്കറ്റ് നൽകില്ലെന്ന വാശിയിലാണ് കൗണ്ടറിലെ ജീവനക്കാർ. കൗണ്ടറുകളിൽ സ്ഥാപിച്ച ക്യു.ആർ കോഡ് സ്‌കാൻ ചെയ്ത് യു.പി.ഐ വഴി ടിക്കറ്റ് എടുക്കാൻ ജീവനക്കാർ നിർബന്ധിക്കുകയാണ്. ഇതോടെ കൈയിൽ പണം കരുതി ടിക്കറ്റ് എടുക്കാൻ എത്തുന്നവർ നട്ടംതിരിയും. ഡിജിറ്റൽ പേയ്‌മെന്റ് ആക്കിയ വിവരം അറിയാതെ പണവുമായി എത്തുന്നവരും ബുദ്ധിമുട്ടും. നിലവിൽ തങ്ങളുടെ കൈയിലുള്ള പണം കൗണ്ടറിലുള്ള മറ്റാർക്കെങ്കിലും നൽകി അവരെ കൊണ്ട് ടിക്കറ്റ് എടുപ്പിക്കേണ്ട അവസ്ഥയിലാണ് യാത്രക്കാർ. ഡിജിറ്റൽ പേയ്‌മെന്റ് വശമില്ലാത്തവരും പ്രായമായവരും ടിക്കറ്റ് എടുക്കാൻ ഏറെ പ്രയാസം അനുഭവിക്കുകയാണ്.

ALSO READ: ബിന്ദുവിന്റെ മൃതദേഹം മാറ്റുന്നതിനിടെ കോൺഗ്രസ് പ്രതിഷേധം; ചാണ്ടി ഉമ്മനടക്കം 30 പേർക്കെതിരെ കേസ് 

മൊബൈൽ ചാർജ് തീരുകയോ നെറ്റ് വർക്ക് കിട്ടാതിരിക്കുകയോ ചെയ്താലും ടിക്കറ്റ് എടുക്കാനാവില്ല. റെയിൽവേ സ്റ്റേഷനിലെ റിസർവേഷൻ കൗണ്ടറുകളിൽ നിന്ന് ടിക്കറ്റ് എടുക്കാനും യു.പി.ഐ പേയ്‌മെന്റിന് നിർബന്ധിക്കുന്നുണ്ട്.
 ഇതുസംബന്ധിച്ച് പരാതി ഉയർന്നെങ്കിലും ക്യാഷ് പേയ്‌മെന്റ് രീതി പുനഃസ്ഥാപിക്കാൻ അധികൃതർ തയാറായിട്ടില്ല. ദേശീയതലത്തിൽ ഇത്തരമൊരു നിർദേശമില്ലെങ്കിലും പാലക്കാട് ഡിവിഷൻ അധികൃതർ ഡിജിറ്റൽ പേയ്‌മെന്റ് അടിച്ചേൽപ്പിക്കുകയാണെന്ന് യാത്രക്കാർ പറയുന്നു.

Passengers were left helpless at several stations in Palakkad division as Indian Railways enforced a digital-only payment system for ticket booking. The sudden move caused inconvenience to those without access to UPI or digital wallets.