തിരുവനന്തപുരം: വാട്‌സ്ആപ്പ് ഗ്രൂപ്പുകളിലെ പോസ്റ്റുകളുടെ പരിപൂര്‍ണ ഉത്തരവാദിത്തം ഗ്രൂപ്പ് അഡ്മിന് മാത്രമല്ല. ഒരാള്‍ അഡ്മിന്‍ ആയി എന്നതുകൊണ്ട് മാത്രം ഗ്രൂപ്പില്‍ വരുന്ന പോസ്റ്റുകളുടെ പേരില്‍ അയാളെ ശിക്ഷിക്കാനുമാവില്ല. ഈ സാഹചര്യത്തില്‍ വാട്‌സ്ആപ്പ് ഹര്‍ത്താലുമായി ബന്ധപ്പെട്ട് ചില ഗ്രൂപ്പ് അഡ്മിനുമാര്‍ക്കെതിരേ എടുത്ത കേസുകളില്‍ ചിലത് നിലനില്‍ക്കില്ല.ഐ.ടി ആക്ടില്‍ വാട്‌സ്ആപ്പ് ഉള്‍പ്പെടെയുള്ള സോഷ്യല്‍ മീഡിയ അഡ്മിന്‍മാര്‍ മധ്യവര്‍ത്തികള്‍ എന്ന ഗണത്തിലാണ് പെടുകയെന്ന് പ്രമുഖ ഐ.ടി വിദഗ്ധനും ഐ.ടി അറ്റ് സ്‌കൂള്‍ എക്‌സിക്യൂട്ടീവ് ഡയരക്ടരുമായ കെ. അന്‍വര്‍ സാദത്ത് പറയുന്നു. ഗൂഗിളും ഫേസ്ബുക്കും മുതല്‍ സാധാരണ സൈബര്‍ കഫേകള്‍ വരെ ഈ വിഭാഗത്തിലാണ്. ഐ.ടി ആക്ടിന്റെ 79ാം വകുപ്പു പ്രകാരം മറ്റാരെങ്കിലും ഉല്‍പാദിപ്പിക്കുന്ന ഉള്ളടക്കത്തിന്റെ (തേഡ് പാര്‍ട്ടി ഇന്‍ഫര്‍മേഷന്‍) ഉത്തരവാദിത്വം വേദിയൊരുക്കുന്നതുകൊണ്ടുമാത്രം മധ്യവര്‍ത്തികള്‍ക്കുണ്ടാവില്ല.
ഈ വകുപ്പിന്റെ മൂന്നുവ്യവസ്ഥകളുടെ പരിധിയിലാണ് പങ്ക് എങ്കില്‍ അവര്‍ കുറ്റക്കാരാവില്ല. ആ വിവരം തയാറാക്കുന്നത് (സ്രോതസ്) അവരല്ലെങ്കില്‍, അത് ആര്‍ക്ക് അയക്കണം എന്ന് തീരുമാനിക്കുന്നത് അവരല്ലെങ്കില്‍, അതിലെ ഉള്ളടക്കം തിരഞ്ഞെടുക്കാനോ അതില്‍ മാറ്റം വരുത്താനോ അവര്‍ക്ക് അധികാരമില്ലെങ്കില്‍ ഒരു വേദി ഒരുക്കിയ അഡ്മിന് ആ ഗ്രൂപ്പില്‍ ആരെങ്കിലും നടത്തുന്ന നിയമവിരുദ്ധ പ്രവര്‍ത്തനങ്ങളുടെ ബാധ്യത വരില്ല. എന്നാല്‍ ആ വിനിമയം പ്രോത്സാഹിപ്പിക്കാന്‍ ഗൂഢാലോചന നടത്തുക, വസ്തുത ശ്രദ്ധയില്‍പ്പെട്ടാലോ അല്ലെങ്കില്‍ സര്‍ക്കാര്‍ ഏജന്‍സികള്‍ അറിയിച്ചാലോ അവ മാറ്റാതിരിക്കുക എന്നിവ ശിക്ഷാര്‍ഹമാണ്.