രാംനഗര്‍: ഗ്രാമീണ വികസനത്തിനുള്ള ഫണ്ട് ശരിയായി ഉപയോഗപ്പെടുത്താന്‍ എല്ലാ ജനപ്രതിനിധികളും ശ്രദ്ധാലുക്കളായിരിക്കണമെന്ന് പ്രധാനമന്ത്രി നരേന്ദ്രമോദി. ദേശീയ പഞ്ചായത്ത് ദിനാഘോഷത്തിന്റെ ഭാഗമായി മധ്യപ്രദേശിലെ മാണ്ഡ്‌ലക്കടുത്ത രാംനഗറില്‍ രാഷ്ട്രീയ ഗ്രാമ സ്വരാജ് അഭിയാന്‍ പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു പ്രധാനമന്ത്രി.
രാജ്യത്തെ ഗ്രാമങ്ങളുടെ വികസനത്തിന് കേന്ദ്ര സര്‍ക്കാര്‍ പ്രതിജ്ഞാബദ്ധമാണ്. വികസനത്തിനായി കൂടുതല്‍ ഫണ്ട് വിനിയോഗിക്കാനും എന്നാല്‍ ഇത് സുതാര്യമായ രീതിയില്‍ വിനിയോഗിക്കണമെന്നത് ഉറപ്പുവരുത്താനും ജനപ്രതിനിധികള്‍ തയാറാകണമെന്നും പ്രധാനമന്ത്രി ആവശ്യപ്പെട്ടു.
ഇന്ത്യയിലെ എല്ലാ ഗ്രാമങ്ങളിലും നല്ല വിദ്യാഭ്യാസം നല്‍കുകയെന്നതാണ് സര്‍ക്കാരിന്റെ ലക്ഷ്യം. പദ്ധതി നിര്‍വഹണത്തിനായി പഞ്ചായത്ത് വകയിരുത്തുന്ന ഫണ്ട് സുതാര്യമാക്കി വിദ്യാഭ്യാസം ഉള്‍പ്പെടെയുള്ളവക്ക് വിനിയോഗിക്കണം.
വകയിരുത്തുന്ന ഫണ്ട് പൂര്‍ണമായും വിനിയോഗിക്കുന്നുണ്ടോയെന്ന് ഓരോ പഞ്ചായത്ത് അംഗങ്ങളും ഉറപ്പുവരുത്തണം. ഗ്രാമത്തിന്റെ വികസനമെന്നതായിരിക്കണം ഓരോരുത്തരുടേയും ലക്ഷ്യം. എന്നാല്‍ ഫണ്ടിന്റെ അപര്യാപ്തത ചൂണ്ടിക്കാട്ടി വികസനം അട്ടിമറിക്കാന്‍ അനുവദിക്കില്ലെന്നും പ്രധാനമന്ത്രി വ്യക്തമാക്കി.