മേപ്പാടി: വീട്ടില്‍ കെട്ടിയിട്ട പട്ടിയെ പുലി വീട്ടുകാരുടെ കണ്‍മുന്നില്‍ വച്ച് കൊന്ന് തിന്നതോടെ ചെമ്പോത്തറ ഗ്രാമവാസികള്‍ ഭീതിയിലായി. ഇന്നലെ രാവിലെ അഞ്ചരയോടെ ചെമ്പോത്തറ ജുമാ മസ്ജിദിന് സമീപത്തായാണ് പുലി ഇറങ്ങിയത്. അഷ്‌റഫിന്റെ വീട്ടില്‍ വളര്‍ത്തുന്ന നായയെയാണ് പുലി കൊന്നത്.
ശബ്ദം കേട്ട് വീട്ടുകാര്‍ പുറത്തിറങ്ങിയപ്പോള്‍ പുലി ഓടിമറിയുകയായിരുന്നു. നായയുടെ പകുതി ഭാഗവും പുലി ഭക്ഷിച്ചു. നല്ല വലിപ്പമുള്ള പുള്ളിപുലിയാണ് നായയെ പിടികൂടിയതെന്ന് അഷ്‌റഫ് പറയുന്നു. കഴിഞ്ഞ ഏതാനും ആഴ്ചകളായി പ്രദേശത്ത് വളര്‍ത്തു മൃഗങ്ങളെ കാണാതാവുന്നതായി പരാതി ഉയര്‍ന്നിരുന്നു. പുലിയെ നേരില്‍ കണ്ടതോടെ പുലിയാകാം ഇവയെ പിടികൂടിയതെന്ന നിഗമനത്തിലാണ് നാട്ടുകാര്‍. പുലി ഇറങ്ങിയ വിവരം ഫോറസ്റ്റ് ഓഫിസില്‍ അറിയിച്ചെങ്കിലും സ്ഥലം സന്ദര്‍ശിക്കാന്‍ പോലും അധികൃതര്‍ തയ്യാറായില്ലന്ന് നാട്ടുകാര്‍ പറയുന്നു. എത്രയും വേഗം കെണി ഒരുക്കി പുലിയെ പിടികൂടാന്‍ നടപടി വേണമെന്നാണ് നാട്ടുകാര്‍ ആവശ്യപ്പെടുന്നത്.