ശാസ്താംകോട്ട: സ്വകാര്യ ബസിലെ യാത്രയ്ക്കിടയില്‍ വീട്ടമ്മയുടെ എട്ടരപ്പവന്‍ സ്വര്‍ണ്ണാഭരണങ്ങളും, മൂവായിരം രൂപയും നഷ്ടമായി. ആഭരണങ്ങള്‍ നഷ്ടമായ വീട്ടമ്മയെ അടുത്തുള്ള പൊലിസ് സ്റ്റേഷനില്‍ എത്തിയ്ക്കാതെ ജീവനക്കാര്‍ വഴിയില്‍ ഇറക്കി വിട്ടതായും പരാതി. ശൂരനാട് വടക്ക് പടിഞ്ഞാറ്റ കിഴക്ക് കുഴിയത്ത് വീട്ടില്‍ ഗിരിജയ്ക്കാണ് ഇത്തരത്തിലുള്ള ദുരനുഭവം നേരിട്ടത്. കഴിഞ്ഞ ദിവസം ഉച്ചകഴിഞ്ഞാണ് സംഭവം. കരുനാഗപ്പള്ളിയിലെ ബാങ്കില്‍ നിന്നും പണയത്തിലുള്ള സ്വര്‍ണ്ണാഭരണങ്ങള്‍ എടുത്ത് വീട്ടിലേക്ക് മടങ്ങും വഴിയാണ് കവര്‍ച്ച നടന്നത്.
സ്വകാര്യ ബസില്‍ യാത്ര ചെയ്യവേ തഴവ കുറ്റിപ്പുറത്തിന് സമീപത്തു വച്ചാണ് കവര്‍ച്ച ശ്രദ്ധയില്‍പ്പെടുന്നത്. കയ്യിലുണ്ടായിരുന്ന ബാഗിലാണ് സ്വര്‍ണ്ണവും പണവും സൂക്ഷിച്ചിരുന്നത്.
ബാഗിന്റെ സിബ് തുറന്ന നിലയിലായിരുന്നു. കവര്‍ച്ച ബസ് ജീവനക്കാരുടെ ശ്രദ്ധയില്‍പ്പെടുത്തിയപ്പോള്‍ സ്റ്റേഷനിലേക്ക് ഓട്ടോ വിളിച്ച് പോകാന്‍ 30 രൂപയും നല്‍കി കുറ്റിപ്പുറത്ത് വീട്ടമ്മയെ ഇറക്കിവിടുകയായിരുന്നുവെന്നാണ് പരാതി.
ജീവനക്കാരുടെ ഈ പ്രവൃത്തി മൂലം മോഷ്ടാവിനെ കണ്ടു പിടിയ്ക്കാനുള്ള സാധ്യത ഇല്ലാതാക്കിയെന്ന് ഇവര്‍ പറയുന്നു. നമോഷണ സംബന്ധിച്ച് വീട്ടമ്മ കരുനാഗപ്പള്ളി പൊലിസ് സ്റ്റേഷനിലും, ബസ് ജീവനക്കാര്‍ക്കെതിരെ കുന്നത്തൂര്‍ ജോയിന്റ് ആര്‍.ടി.ഒയ്ക്കും പരാതി നല്‍കി.