തൊടുപുഴ: നെറ്റ് വര്‍ക്ക് നിലനില്‍ക്കാത്തതും ഇ - പോസ് യന്ത്രം പണിമുടക്കുന്നതും മൂലം ജില്ലയില്‍ റേഷന്‍ സംവിധാനം താറുമാറായി.
സെര്‍വര്‍ തകരാറിലായതോടെ കഴിഞ്ഞദിവസം റേഷന്‍ വാങ്ങാനെത്തിയവര്‍ നിരാശയോടെ മടങ്ങി. ഇ-പോസ് യന്ത്രം വഴി റേഷന്‍ നല്‍കാന്‍ തുടങ്ങിയതോടെയാണ് റേഷന്‍ വിതരണം താളം തെറ്റിയത്. സെര്‍വര്‍ തകരാറിനെ തുടര്‍ന്ന് ജില്ലയില്‍ മണിക്കൂറുകളോളം വിതരണം തടസ്സപ്പെട്ടു. ഇതേത്തുടര്‍ന്നു പലരും റേഷന്‍ വാങ്ങാനാകാതെ മടങ്ങി. പല റേഷന്‍കടകളിലും ഇപ്പോഴും ആവശ്യത്തിന് റേഷന്‍ എത്തിയിട്ടില്ല.
ജില്ലയിലെ എല്ലാ കടകളിലും റേഷന്‍ എത്താന്‍ ഇനിയും ഒരാഴ്ച കൂടിവേണ്ടിവരുമെന്നാണു സൂചന. പല കടകളിലും ആവശ്യത്തിനു സ്‌റ്റോക്കില്ലാത്തതും വിതരണത്തെ ബാധിക്കുന്നുണ്ട്. ഇതിനിടെ ഇപോസ് യന്ത്രത്തിന്റെ പ്രവര്‍ത്തനം അവതാളത്തിലാകുന്നതും പ്രശ്‌നങ്ങള്‍ക്കു കാരണമാകുന്നുണ്ട്. മൊബൈല്‍ സിം കാര്‍ഡ് ഉപയോഗിച്ചാണ് ഇ-പോസ് യന്ത്രം പ്രവര്‍ത്തിക്കുന്നത്. ബിഎസ്എന്‍എല്‍, വോഡഫോണ്‍ സിം കാര്‍ഡുകളാണ് യന്ത്രത്തില്‍ ഉപയോഗിക്കുന്നത.് നെറ്റ്‌വര്‍ക്കനുസരിച്ച് രണ്ടു സിമ്മുകളും മാറിമാറി പ്രവര്‍ത്തിക്കും. എന്നാല്‍ 3ജി സംവിധാനമുണ്ടെങ്കില്‍ മാത്രമേ ഇ-പോസ് യന്ത്രം സുഗമമായി പ്രവര്‍ത്തിക്കുകയുള്ളു.
പലയിടങ്ങളിലും റേഞ്ചിന്റെ പ്രശ്‌നമുള്ളത് വിതരണം താമസിക്കുന്നതിനു കാരണമാകും. യന്ത്രത്തില്‍ കാര്‍ഡ് നമ്പറും വിരലടയാളവും രേഖപ്പെടുത്തിയ ശേഷമാണ് റേഷന്‍ വിതരണം ചെയ്യാന്‍ യന്ത്രം അനുമതി നല്‍കുന്നത്. യന്ത്രത്തില്‍ രേഖപ്പെടുത്താതെ റേഷന്‍ വിതരണം നല്‍കാന്‍ സാധിക്കുകയില്ല.