പട്ടാമ്പി: മേലെ പട്ടാമ്പി ജങ്ഷനിലെ പെരിന്തല്‍മണ്ണ റോഡില്‍ സിഗ്‌നലിന് സമീപം ഇന്റര്‍ലോക്ക് കട്ട വിരിക്കല്‍ പ്രവൃത്തി ആരംഭിച്ചു. 70 മീറ്ററോളം ദുരമാണ് കട്ട വിരിക്കുന്നത്. ജെ.സി.ബി ഉപയോഗിച്ച് റോഡിന്റെ ഉപരിതലം പൊളിച്ചുനീക്കുന്നുണ്ട്. ഇതിനെ തുടര്‍ന്ന് റോഡില്‍ ഗതാഗത നിയന്ത്രണവും ഏര്‍പ്പെടുത്തിയിട്ടുണ്ട്. പട്ടാമ്പി-കുളപ്പുളളി പാതയില്‍ മൂന്നിടങ്ങളില്‍ കട്ട വിരിക്കല്‍ പ്രവൃത്തി നേരത്തെ പൂര്‍ത്തിയാക്കിയതാണ്. ഇതിന്റെ തുടര്‍ച്ചയാണ് മേലെ പട്ടാമ്പിയിലും കട്ട വിരിക്കല്‍ നടക്കുന്നത്.
ജങ്ഷനില്‍ ഒറ്റവരി പാതയിലാണ് ഇപ്പോള്‍ ഗതാഗതം നടക്കുന്നത്. ഒരാഴ്ചക്കകം പ്രവൃത്തികള്‍ പൂര്‍ത്തിയാക്കാനാണ് ലക്ഷ്യമിടുന്നത്. ജങ്ഷനിലെ പാലക്കാട് റോഡില്‍ ആഴ്ചകള്‍ക്ക് മുന്‍പ് അറ്റകുറ്റപണികള്‍ നടത്തിയിരുന്നു. എന്നാല്‍ പെരിന്തല്‍മണ്ണ റോഡിന്റെ ഭാഗത്ത് നിരത്ത് പാടെ തകര്‍ന്ന് കിടക്കുകയാണ്. വലിയ കുഴികളും രൂപപ്പെട്ടിട്ടുണ്ട്. പട്ടാമ്പി-പുലാമന്തോള്‍ ഡിസൈന്‍ റോഡിന്റെ പ്രവൃത്തികള്‍ തുടങ്ങുന്നതോടെ മാത്രമേ ഈ പാതയുടെ തകര്‍ച്ചക്ക് പൂര്‍ണമായും പരിഹാരമാവുകയുള്ളൂ.