പാപ്പിനിശ്ശേരി: ദേശീയപാതയില്‍ വേളാപുരം മുതല്‍ പുതിയതെരു വരെയുള്ള ടാറിങ് പ്രവൃത്തിയില്‍ ക്രമക്കേടാരോപിച്ച് നാട്ടുകാര്‍ ദേശീയപാതാ വിഭാഗം എന്‍ജിനിയറെ ഉപരോധിച്ചു.
ഞായറാഴ്ച വെളുപ്പിന് വേളാപുരത്ത് നടന്ന ടാറിങ് പ്രവൃത്തിയിലാണ് ക്രമക്കേട് കണ്ടെത്തിയത്. വിവരമറിഞ്ഞ സ്ഥലത്തെത്തിയ ദേശീയപാത വിഭാഗം അസി. എക്‌സിക്യൂട്ടിവ് എന്‍ജിനിയറെ രോഷാകുലരായ നാട്ടുകാര്‍ ഉപരോധിക്കുകയായിരുന്നു. സംഘര്‍ഷമുണ്ടായതിനെ തുടര്‍ന്ന് വളപട്ടണം എസ്.ഐ കെ രവീന്ദ്രനും സംഘവും സ്ഥലത്തെത്തി സമരക്കാരെ ശാന്തരാക്കി. ഞായറാഴ്ച പുലര്‍ച്ചെ നാലുമണിയോടെയാണ് ടാറിങ് നടത്തിയത്. നാട്ടുകാരും പൊലിസും എന്‍ജിനിയറും സംയുക്തമായി നടത്തിയ ചര്‍ച്ചയെ തുടര്‍ന്ന് ടാറിങ് നിര്‍ത്തിവയ്ക്കാനും നേരത്തെ നടത്തിയ പ്രവൃത്തി മാറ്റിചെയ്യാനും ധാരണയായി. നേരത്തെ ചെയ്ത പ്രവൃത്തിയില്‍ ക്രമക്കേടാരോപിച്ചു നാട്ടുകാര്‍ മന്ത്രി ജി സുധാകരന്‍, പൊതുമരാമത്ത് വിജിലന്‍സ് വിഭാഗം, മുഖ്യമന്ത്രി എന്നിവര്‍ക്ക് പരാതി അയച്ചിരുന്നു.