ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിക്കും ചെല്‍സിക്കും ഇന്ന് മത്സരം. കിരീട പ്രതീക്ഷ ഏറെ കുറെ അസ്തമിച്ചെങ്കിലും ബാക്കിയുള്ള മത്സരത്തിലെല്ലാം ജയിക്കാനുള്ള ഒരുക്കത്തിലാണ് സിറ്റി. 

ഇന്ന് രാത്രി 8.30ന് നടക്കുന്ന മത്സരത്തില്‍ ക്രിസ്റ്റല്‍ പാലസിനെയാണ് സിറ്റി നേരിടുന്നത്. സിറ്റിയുടെ ഹോം ഗ്രൗണ്ടിലാണ് മത്സരം നടക്കുന്നത്. ലെസ്റ്റര്‍ സിറ്റിയെ പിന്തള്ളി രണ്ടാം സ്ഥാനത്തെത്തിയ സിറ്റിക്ക് ഇപ്പോള്‍ 22 മത്സരത്തില്‍ നിന്ന് 47 പോയിന്റാണുള്ളത്. ഒരു മത്സരം കുറവ് കളിച്ച ലിവര്‍പൂളുമായി 14 പോയിന്റിന്റെ വ്യത്യാസമാണ് ഇപ്പോള്‍ സിറ്റിക്കുള്ളത്. 22 മത്സരത്തില്‍നിന്ന് 29 പോയിന്റുമായി ക്രിസ്റ്റല്‍ പാലസ് 9ാം സ്ഥാനത്തുമാണുള്ളത്. പ്രീമിയര്‍ ലീഗില്‍ നടന്ന അവസാന മത്സരത്തില്‍ ആസ്റ്റണ്‍ വില്ലയെ 6-1 എന്ന സ്‌കോറിന് തകര്‍ത്തതിന്റെ ആത്മവിശ്വാസത്തിലാണ് സിറ്റി ഇന്നിറങ്ങുന്നത്. വൈകിട്ട് ആറിന് നടക്കുന്ന മത്സരത്തില്‍ ടോട്ടനവും വാട്‌ഫോര്‍ഡും ഏറ്റുമുട്ടും. 

പട്ടികയില്‍ എട്ടാം സ്ഥാനത്തുള്ള ടോട്ടനം തിരിച്ചുവരവിനുള്ള ഒരുക്കത്തിലാണ്. രാത്രി 11 ന് നടക്കുന്ന മത്സരത്തില്‍ ന്യൂകാസില്‍ യുനൈറ്റഡാണ് ചെല്‍സിയുടെ എതിരാളികള്‍. പട്ടികയില്‍ നാലാം സ്ഥാനത്തുള്ള ചെല്‍സി മികച്ച ഫോമിലാണുള്ളത്. 

രാത്രി 8.30ന് നടക്കുന്ന മറ്റൊരു മത്സരത്തില്‍ ബ്രൈറ്റണ്‍ ആസ്റ്റണ്‍വില്ലയെ നേരിടും. ഇതേ സമയത്ത് നടക്കുന്ന മറ്റൊരു മത്സരത്തില്‍ ആഴ്‌സനല്‍ ഷെഫ് യുനൈറ്റഡിനെ നേരിടും. പട്ടികയില്‍ പത്താം സ്ഥാനത്ത് നില്‍ക്കുന്ന ആഴ്‌സനല്‍ ആറാം സ്ഥാനത്തുള്ള ഷെഫു യുനൈറ്റഡുമായിട്ടാണ് ഏറ്റുമുട്ടുന്നത്. 

മറ്റൊരു മത്സരത്തില്‍ വെസ്റ്റ് ഹാം എവര്‍ട്ടനെ നേരിടും. പട്ടികയിലെ അവസാന സ്ഥാനക്കാരായ നോര്‍വിച്ച് സിറ്റി ബേണ്‍മൗത്തിനെ നേരിടും. രാത്രി 8.30ന് നടക്കുന്ന മത്സരത്തില്‍ സതാംപ്ടണും വോള്‍വ്‌സും ഏറ്റുമുട്ടും.