സുല്‍ത്താന്‍ ബത്തേരി: ദേശീയപാത 766ലെ രാത്രിയാത്രാ നിരോധവുമായി ബന്ധപ്പെട്ട കേസ് പരിഗണിക്കുന്നത് സുപ്രിംകോടതി നാല് അഴ്ചത്തേക്ക് നീട്ടിവച്ചു. സത്യവാങ് മൂലം നല്‍കാന്‍ സംസ്ഥാന സര്‍ക്കാര്‍ സമയം ആവശ്യപ്പെട്ടതനുസരിച്ചാണ് കേസ് പരിഗണിക്കുന്നത് കോടതി നീട്ടിയത്.
സംസ്ഥാന സര്‍ക്കാര്‍ ഡിസംബര്‍ ഒന്‍പതിന് നല്‍കിയ സത്യവാങ്മൂലത്തിനു പുറമെ അഡീഷണല്‍ സത്യവാങ്മൂലം നല്‍കാന്‍ സമയം ആവശ്യപ്പെട്ടതു പ്രകാരമാണ് നടപടി. രാക്കുരുക്ക് സംബന്ധിച്ച് സുപ്രിംകോടതിയില്‍ സത്യവാങ്മൂലം നല്‍കുന്നതുമായി ബന്ധപ്പെട്ട് ഇക്കഴിഞ്ഞ ഡിസംബര്‍ 12ന് തിരുവനന്തപുരത്ത് ഗതാഗതവകുപ്പ് മന്ത്രിയുടെ നേതൃത്വത്തില്‍ യോഗം ചേര്‍ന്നിരുന്നു. യോഗത്തില്‍ സമയബന്ധിതമായി സത്യവാങ്മൂലം നല്‍കുന്നതിന് പൊതുമരാമത്ത്, വനം, ഗതാഗത വകുപ്പ് സെക്രട്ടറിമാരെ ചുമതലപ്പെടുത്തിയിരുന്നു. എന്നാല്‍ ഈ യോഗം ചേരുന്നതിന് രണ്ട് ദിവസം മുന്നേ രാത്രിയാത്ര നിരോധനം നിലനില്‍ക്കുന്ന ദേശീയപാത 766ന് ബദലായി കുട്ട- ഗോണിക്കുപ്പ റോഡ് ചൂണ്ടിക്കാട്ടി സര്‍ക്കാര്‍ സത്യവാങ്മൂലം നല്‍കിയതിനെതിരേ ശക്തമായ വിമര്‍ശനം ഉയര്‍ന്നിരുന്നു.
പ്രതിഷേധം ചൂടുപിടിച്ചതോടെ വിശദമായ സത്യവാങ്മൂലം തയാറാക്കി നല്‍കാമെന്ന് സര്‍ക്കാര്‍ ഉറപ്പ് നല്‍കി. തുടര്‍ന്ന് തയാറാക്കിയ സത്യവാങ്മൂലത്തിലും കുട്ട- ഗോണിക്കുപ്പ ബദല്‍ പാതയ്ക്കു പുറമെ പനമരം- പയ്യമ്പള്ളി - കാട്ടിക്കുളം - കുട്ട -ഗോണിക്കുപ്പ റോഡും ബദല്‍പാതയായി ഉയര്‍ത്തിക്കാണിച്ചതിലും ശക്തമായ പ്രതിഷേധം ഉയര്‍ന്നിരുന്നു. ഇതിനിടയിലാണ് ഇന്നലെ സുപ്രിംകോടതി കേസ് പരിഗണിച്ചത്. ഇതോടെയാണ് അഡീഷനല്‍ സത്യവാങ്മൂലം നല്‍കാന്‍ സംസ്ഥാനം സമയം ആവശ്യപ്പെട്ടത്. ഇത് പരിഗണിച്ചാണ് കോടതി നാല് ആഴ്ചത്തേക്ക് സമയം അനുവദിച്ചിരിക്കുന്നത്.