ന്യൂഡല്‍ഹി: ശത്രുവിമാനങ്ങള്‍ക്കും ആളില്ലാ വിമാനങ്ങള്‍ക്കും (ഡ്രോണുകള്‍) നേരെ പ്രയോഗിക്കാന്‍ കഴിയുന്ന മിസൈലുകള്‍ ഇസ്രാഈലില്‍നിന്നു വാങ്ങാന്‍ അനുമതി. 17,000 കോടി രൂപയുടെ മിസൈല്‍ ഇടപാടിന് പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ബുധനാഴ്ച ചേര്‍ന്ന സുരക്ഷയ്ക്കായുള്ള കേന്ദ്രമന്ത്രിസഭാ സമിതിയാണ് അംഗീകാരം നല്‍കിയത്. കരസേനയ്ക്കായി മധ്യദൂര ശേഷിയുള്ള ഉപരിതലത്തില്‍ നിന്ന് വായുവിലേക്ക് തൊടുക്കാവുന്ന മിസൈലുകളാണ് ഇന്ത്യ വാങ്ങുക. ഇസ്രാഈല്‍ എയര്‍ക്രാഫ്റ്റ് ഇന്‍ഡസ്ട്രിയും ഇന്ത്യയുടെ പ്രതിരോധ ഗവേഷണ വികസനസമിതിയും (ഡി.ആര്‍ഡി.ഒ) ചേര്‍ന്നാണ് മിസൈല്‍ വികസിപ്പിക്കുക. ഇന്ത്യയുടെ ആകാശം സുരക്ഷിതമാക്കുകയെന്ന ലക്ഷ്യത്തോടെയാണിതെന്ന് ഔദ്യോഗികവൃത്തങ്ങള്‍ അറിയിച്ചു. 50 മുതല്‍ 70 വരെ കിലോമീറ്റര്‍ ഉയരത്തില്‍ പറക്കുന്ന ശത്രുമിസൈലുകളെ തകര്‍ക്കാന്‍ ഇവയ്ക്കു ശേഷിയുണ്ട്. 40 ഫയറിങ് യൂനിറ്റുകളിലായി 200 മിസൈലുകളുള്ള സംവിധാനമാണ് വാങ്ങുന്നത്. ഇത്തരത്തില്‍ അഞ്ചു റെജിമെന്റുകളുണ്ടാകും. കരാര്‍ ഒപ്പിട്ട് 72 മാസത്തിനുള്ളില്‍ ആദ്യ യൂനിറ്റ് ഇന്ത്യയിലെത്തിക്കും. 2023 ഓടെ ഇത് സൈന്യത്തിന് ഉപയോഗിക്കാന്‍ സാധിക്കും.
ഇന്ത്യയുടെ വിവിധ പ്രതിരോധ ആവശ്യങ്ങള്‍ക്കുള്ള ഉപകരണങ്ങള്‍ നിലവില്‍ ഇസ്രാഈലുമായി ചേര്‍ന്നാണ് നിര്‍മിക്കുന്നത്. ഡി.ആര്‍.ഡി.ഒയുടെ മിസൈല്‍ വിഭാഗം തലവന്‍ ജി. സതീഷ് റെഡ്ഡിക്കാണ് പുതിയ പദ്ധതിയുടെ മേല്‍നോട്ടച്ചുമതല. വ്യോമസേനയ്ക്കും നാവികസേനയ്ക്കുമായി സമാനമായ മിസൈലുകള്‍ നിലവില്‍ ഇരു രാജ്യങ്ങളും ചേര്‍ന്ന് വികസിപ്പിച്ച് വരുന്നുണ്ട്. 2009ല്‍ തന്നെ വ്യോമസേനയ്ക്കും നാവികസേനയ്ക്കുമായി ഇത്തരം മിസൈലുകള്‍ വാങ്ങാന്‍ അന്നത്തെ യു.പി.എ സര്‍ക്കാര്‍ അനുമതി നല്‍കിയിരുന്നു.