ന്യൂഡല്‍ഹി: എ.ടി.എം കൗണ്ടറില്‍ നിന്ന് 'ചില്‍ഡ്രന്‍സ് ബാങ്ക് ഓഫ് ഇന്ത്യ'യുടെ പേരില്‍ അച്ചടിച്ച 2,000 രൂപയുടെ നോട്ടുകള്‍ വീണ്ടും. ഏതാനും ദിവസം മുമ്പ് ദക്ഷിണ ഡല്‍ഹിയിലെ സംഗം വിഹാറിലെ എസ്.ബി.ഐ എ.ടി.എം കൗണ്ടറില്‍ നിന്ന് ചില്‍ഡ്രന്‍സ് ബാങ്ക് ഓഫ് ഇന്ത്യയുടെ പേരില്‍ അച്ചടിച്ച 2,000 രൂപയുടെ നോട്ടുകള്‍ ലഭിച്ചതിനു പിന്നാലെയാണ് പുതിയ സംഭവവും പുറത്തുവന്നത്.
ഗാസിയാബാദിലെ എസ്.ബി.ഐയുടെ എ.ടി.എം കൗണ്ടറില്‍ നിന്ന് 2000 രൂപയുടെ വ്യാജനോട്ടുകള്‍ ലഭിച്ചതായി സിദ്ധാര്‍ഥ് ശശയ്കര്‍ അവകാശപ്പെട്ടു. ഇന്ദിരാപുരം ഗയ്ന്‍കാന്തിലെ എസ്.ബി.ഐ എ.ടി.എമ്മില്‍ നിന്നാണ് സിദ്ധാര്‍ഥ് 2000 രൂപ പിന്‍വലിച്ചത്. എന്നാല്‍ ഇത് ബ്രാഞ്ച് മാനേജര്‍ നിഷേധിച്ചിരുന്നു.
സംഗംവിഹാറില്‍ നിന്നു ലഭിച്ച നോട്ടുകളിലുള്ളതു പോലെ ഗാസിയാബാദില്‍ നിന്നു ലഭിച്ച നോട്ടിലും നിറയെ പരിഹാസങ്ങളാണുള്ളത്. നോട്ടുകളിലെ സീരിയല്‍ നമ്പര്‍ എല്ലാം 000000 ആണ്. രൂപ അടയാളമില്ല. റിസര്‍വ് ബാങ്ക് മുദ്രയ്ക്കു പകരം പി.കെ മുദ്രയും. ഗവര്‍ണറുടെ ഒപ്പുമില്ല.
രണ്ടായിരം രൂപയ്ക്ക് തുല്യമായ മൂല്യം നല്‍കുമെന്ന ഗവര്‍ണറുടെ പ്രസ്താവനക്കു പകരം ഇതിനു തുല്യമായ കൂപ്പണ്‍ നല്‍കുമെന്നു ഗാസിയാബാദിലെ നോട്ടിലും പറയുന്നു.
അതേസമയം, തങ്ങളുടെ എ.ടി.എം കൗണ്ടറുകളില്‍ നിന്നു പരിഹാസ നോട്ടുകള്‍ (പ്രാങ്ക് കറന്‍സി) തുടര്‍ച്ചയായി ലഭിച്ചത് എസ്.ബി.ഐയെ ഞെട്ടിച്ചിട്ടുണ്ട്.