ബഗ്ദാദ്: അമേരിക്കന്‍ പിന്തുണയുള്ള ഇറാഖി സൈന്യം ഐ.എസ് നിയന്ത്രണത്തിലുള്ള മൗസിലിന്റെ പടിഞ്ഞാറന്‍ ഭാഗം പൂര്‍ണമായും തിരിച്ചുപിടിക്കുന്നു. കഴിഞ്ഞ ദിവസം നഗരത്തിലെ വിമാനത്താവളവും സൈനിക താവളവും സൈന്യം പിടിച്ചടക്കി. മൗസില്‍ വിമാനത്താവളം ഭീകരവിരുദ്ധ സേനയും ഇറാഖ് ആഭ്യന്തര മന്ത്രാലയത്തിന്റെ ധ്രുതകര്‍മസേനയും ഇന്നലെ പുലര്‍ച്ചെ നിയന്ത്രണത്തിലാക്കിയിട്ടുണ്ട്. മൗസിലിന്റെ 30 കിലോമീറ്റര്‍ ദൂരത്തിലാണ് സര്‍ക്കാര്‍ സൈന്യം നിയന്ത്രണം തിരിച്ചുപിടിച്ചത്.2014 ജൂണിലാണ് ബഗ്ദാദ്- മൗസില്‍ ദേശീയപാതയിലുള്ള വിമാനത്താവളവും സൈനിക സമുച്ചയവുമടങ്ങുന്ന മേഖല ഇറാഖ് സര്‍ക്കാറില്‍നിന്ന് ഐ.എസ് കീഴടക്കിയത്. മൊസൂളിന്റെ പടിഞ്ഞാറന്‍ മേഖലയില്‍നിന്ന് ഐ.എസിനെ തുരത്താനായി സൈന്യം നടത്തിയ ഓപറേഷനു പിറകെയായിരുന്നു ഇത്.