കൂത്താട്ടുകുളം: ഗവ.യു.പി സ്‌കൂളില്‍ 'അറിവുത്സവം 2017' ചൊവ്വാഴ്ച രാവിലെ 10 മുതല്‍ രാത്രി ഒന്‍പത് വരെ നടക്കും. ശാസ്‌ത്രോത്സവം, ഗണിതോത്സവം, മികവിന്റെ അവതരണം ബാലോത്സവം, ബഹിരാകാശ നിരീക്ഷണവും ശാസ്ത്ര ക്ലാസുമുള്‍പ്പെടുത്തിയ ആകാശകാഴ്ചകള്‍, തുടങ്ങിയ പരിപാടികള്‍ കോര്‍ത്തിണക്കിയാണ് കുട്ടികള്‍ക്കും രക്ഷിതാക്കള്‍ക്കും നാട്ടുകാര്‍ക്കുമായി അറിവുത്സവം നടത്തുന്നത്. രാവിലെ 10 മുതല്‍ മികവ് പ്രദര്‍ശനം തുടങ്ങും. എല്‍.പി വിഭാഗം കുട്ടികള്‍ക്കായി ഗണിതോത്സവവും, യു.പി വിഭാഗം കുട്ടികള്‍ക്കായി ശാസ്‌ത്രോത്സവവും അനുബന്ധ പഠന പ്രവര്‍ത്തനങ്ങളും രാവിലെ മുതല്‍ ആരംഭിക്കും.
വൈകിട്ട് 4ന് നടക്കുന്ന ചടങ്ങില്‍ ബാലോത്സവം നഗരസഭ ചെയര്‍മാന്‍ പ്രിന്‍സ് പോള്‍ ജോണ്‍ ഉദ്ഘാടനം ചെയ്യും. തുടര്‍ന്ന് ഭക്ഷണം, നാടന്‍ കളികള്‍, വൈകിട്ട് ആറിന് ശാസ്ത്ര ക്ലാസ്, റോയി വര്‍ഗീസ് നേതൃത്വം നല്‍കും. എഴ് മുതല്‍ വാനനിരീക്ഷണം, 8.30 ന് ക്യാംപ് ഫയര്‍, കലാസാംസ്‌കാരിക പരിപാടികള്‍.