കുന്നംകുളം: അന്തരിച്ച മുന്‍ രാഷ്ട്രപതി കെ.ആര്‍ നാരായണന്റെ പേരില്‍ തപാല്‍ സ്റ്റാംമ്പ് പുറത്തിറക്കാന്‍ രാഷ്ട്രപതി പ്രണവ് മുഖര്‍ജി ഇടപെടുന്നു. ഇന്ത്യയിലെ 12 മുന്‍ രാഷ്ട്രപതിമാരില്‍ കെ.ആര്‍ നാരായണന്‍ ഒഴികെയുള്ളവരുടെ ചിത്രം ആലേഖനം ചെയ്ത പോസ്റ്റല്‍ സ്റ്റാംമ്പുകള്‍ പുറത്തിറങ്ങിയെങ്കിലും കെ.ആര്‍ നാരായണന്റെ ചിത്രമുള്ള സ്റ്റാംമ്പ് ഇതുവരേയും പുറത്തിറങ്ങിയിരുന്നില്ല.
ബന്ധപെട്ട ആരും തന്നെ ഇത് സംബന്ധിച്ചുള്ള ഇടപെടലും നടത്തിയിരുന്നില്ല. ഇന്ത്യയിലെ ആദ്യത്തെ ദളിത് വിഭാഗത്തില്‍ നിന്നുള്ള രാഷ്ട്രപതി എന്നതിനുമപ്പുറം മലയാളത്തിന് അഭിമാനകരമായ ഒട്ടേറെ പ്രവര്‍ത്തനങ്ങള്‍ക്ക് ചുക്കാന്‍ പിടിച്ച കെ.ആര്‍ ഒറ്റപാലത്ത് നിന്നുള്ള പാര്‍ലമെന്റ് പ്രതിനിധിയായിരുന്നു.
1992 മുതല്‍ 97 വരെ ഉപരാഷ്ട്രപതിയായിരുന്ന കെ.ആര്‍ 97 മുതല്‍ 2005 വരെ രാഷ്ട്രപതി പദം അലങ്കരിച്ചു. രാഷ്ട്രപതിമാരുടെ ചിത്രം ആലേഖനം ചെയ്ത പോസ്റ്റല്‍ സ്റ്റാംമ്പുകള്‍ മറ്റു ഇടപെടലുകളൊന്നുമില്ലാതെ തന്നെ ഡിപാര്‍ട്ട്‌മെന്റ് പുറത്തിറക്കുക പതിവാണ്.
ആദ്യ പ്രസിഡന്റ് ഡോ. രാജേന്ദ്ര പ്രസാദ് മുതല്‍ 12-ാമത് രാഷ്ട്രപതി പ്രതിഭാ പാട്ടേലുള്‍പെടേയുള്ളവരുടെ സ്റ്റാംമ്പുകള്‍ പുറത്തിറക്കിയെങ്കിലും 10-ാമത് രാഷ്ട്രപതിയായിരുന്ന കെ.ആര്‍ നാരായണനെ മാത്രം വിസ്മരിക്കപെട്ടു. കെ.ആര്‍ നാരായണന്റെ പ്രവര്‍ത്തന മണ്ഡലമായ കുന്നംകുളം ഫിലാറ്റ്‌ലി ക്ലബ്ബ് പ്രസിഡന്റും പൊതു പ്രവര്‍ത്തകനുമായ ലബീബ് ഹസന്‍ ഈ കാര്യം ചൂണ്ടികാട്ടി നിലവിലെ രാഷ്ട്രപതി പ്രണബ് മുഖര്‍ജിക്ക് കത്തയച്ചതോടെയാണ് ചര്‍ച്ചയായത്.
വിഷയം ബോധ്യപെട്ട രാഷ്ട്രപതിയുടെ ഓഫിസ് ഇതു സംബന്ധിച്ച വിവരം ആരാഞ്ഞ് തപാല്‍ വകുപ്പിന്റെ സ്റ്റാംപ് പ്രിന്റിങ് കൈകാര്യ ചെയ്യുന്ന ഫിലാറ്റ്‌ലി അഡൈ്വസിങ് കമ്മിറ്റിയുടെ തലവന്‍ എസ്.എല്‍ പട്ടേലിന് കത്തയച്ചു.
വിഷയത്തില്‍ അടുത്ത ഫിലാറ്റ്‌ലി കമ്മിറ്റിയില്‍ അജണ്ടായിവച്ച് തീരുമാനമെടുക്കുമെന്ന ഉറപ്പോടെ അസിസ്റ്റന്റ് ഡയറക്ടര്‍ ജനറല്‍ ലബീബിന് കത്തയച്ചു. കേരളത്തിന്റെ അഭിമാനമായിരുന്ന കെ.ആര്‍ നാരായണന് വിസ്മരിക്കപെട്ട അംഗീകാരം വീണ്ടെടുക്കാനായി കുന്നംകുളം തന്നെ പ്രവര്‍ത്തിച്ചുവെന്നത് നാടിന്റെ അഭിമാന മുഹൂര്‍ത്തമാവുകയാണ്.