മലപ്പുറം:  ആശയങ്ങളോടൊപ്പം വിദ്യാര്‍ഥികളെ സ്വാധീനിക്കുന്ന ഡിജിറ്റല്‍ സംവേദന ശൈലിയുമായി മദ്‌റസാ പഠനത്തിന്  പരിഷ്‌കരിച്ച പാഠപുസ്തകങ്ങള്‍. സമസ്ത കേരളാ ഇസ് ലാം മത വിദ്യാഭ്യാസ ബോര്‍ഡിന്റെ ഒന്നു മുതല്‍ നാലം തരം വരെയാണ് പുത്തന്‍ പഠന സമീപന രീതികളെ അവലംബമാക്കി പുതിയ പാഠ്യപദ്ധതി തയാറാക്കിയത്. പാരമ്പര്യ രീതി നിലനിര്‍ത്തി നൂതന സാങ്കേതിക വിദ്യകളുടെ സഹായത്തോടെയാണ് പുതിയ പാഠപുസ്തക പരിഷ്‌കരണം. പഠനവിഷയങ്ങളെ കൂടുതലറിയാന്‍ ഡിജിറ്റല്‍ ഉള്ളടക്കത്തോടു കൂടിയാണ് പുസ്തകങ്ങള്‍ വിദ്യാര്‍ഥികളെ കാത്തിരിക്കുന്നത്. പ്രാഥമിക മദ്‌റസാ രംഗത്ത് ബാര്‍കോഡ് സഹിതമുള്ള പാഠപുസ്തകങ്ങളും, നൂതന പഠന, പ്രായോഗിക പരിശീലനവും വഴി നൂറാം വാര്‍ഷികത്തിന്റെ നിറവില്‍ സമസ്തയുടെ മദ്‌റസാ പ്രസ്ഥാനം ശ്രദ്ധേയമാവുകയാണ്. 

ഓതിപ്പഠിക്കാനും, പുസ്തകത്തിലെ പാഠങ്ങള്‍ മനസിലാക്കാനും, പാഠം പഠിക്കാനും കര്‍മശാസ്ത്ര നിയമങ്ങളുടെ പ്രായോഗിക പരിശീലനത്തിനും   പാഠപുസ്തകത്തിലെ ബാര്‍കോഡ് സ്‌കാന്‍ ചെയ്താല്‍ മതി. കണ്ടും കേട്ടും പഠിക്കാനും ആവര്‍ത്തിച്ചു പഠിക്കാനും ഒട്ടേറെ കാര്യങ്ങളാണ് സ്‌ക്രീനില്‍ തെളിയുക. 

 

ആദ്യഘട്ടത്തില്‍ പ്രൈമറി തലങ്ങളിലെ 18 പാഠപുസ്തകങ്ങളാണ് തയാറാക്കിയത്. റമദാന്‍ അവധി കഴിഞ്ഞ് പുതിയ അധ്യയന വര്‍ഷം പുതിയ പാഠപുസ്തകം മദ്‌റസകളിലെത്തും.  ഖുര്‍ആന്‍ പഠനത്തിന് പ്രത്യേക ഊന്നല്‍ നല്‍കുന്നതാണ് പുതിയ പാഠ്യപദ്ധതി. രണ്ടാം തരം മുതല്‍ പത്താം തരം വരെ ഖുര്‍ആന്‍ പാരായണം പഠനവിഷയമായി ഉള്‍പ്പെടുത്തിയിട്ടുണ്ട്. ഒരു ഖത്മ് പഠനം ഏഴാം തരത്തില്‍ പൂര്‍ത്തിയാകും. എട്ടുമുതല്‍ പത്തുവരെ ആവര്‍ത്തിച്ചുള്ള പഠനവുമാണ് സിലബസ് ക്രമം. ഖുര്‍ആന്‍ പാരായണം,  ഹിഫ്‌ള്, പാരായണ നിയമങ്ങള്‍ എന്നിവയുടെ പഠനത്തിന് സഹായകമായി  തദ് രീബുത്തിലാവ എന്ന പുതിയ പുസ്തകമുണ്ട്. മൂന്ന്,നാല് ക്ലാസിലേക്ക് പുസ്തകമായും രണ്ടാംതരത്തില്‍ അധ്യാപകര്‍ക്കുള്ള ഹാന്‍ഡ് ബുക്കായുമാണ് ഇത് ഉള്‍പ്പെടുത്തിയത്. അതാത് ക്ലാസില്‍ പഠിപ്പിക്കുന്ന ഖുര്‍ആന്‍ പാഠങ്ങളെ അടിസ്ഥാനപ്പെടുത്തിയാണ്  ഈ പുസ്തകത്തിന്റെ ഉള്ളടക്കം. 

 

മുതിര്‍ന്ന ക്ലാസില്‍ നിലവില്‍ അഖീദ, അഖ്‌ലാഖ് പാഠങ്ങളടങ്ങിയ ദുറൂസുല്‍ ഇഹ്‌സാന്‍ എന്ന പുസ്തകം പുതിയ മാറ്റത്തില്‍ രണ്ടാംതരം മുതല്‍ ഏര്‍പ്പെടുത്തിയിട്ടുണ്ട്. സ്വഭാവ സംസ്‌കരണ പാഠങ്ങള്‍(അഖ്‌ലാഖ്) പുസ്തകമായാണ് പ്രൈമറിയില്‍ ഇത് ഉള്‍പ്പെടുത്തിയത്. തഹ്ഫീം,ദുറൂസ്, അഖീദ, ഫിഖ്ഹ്, താരീഖ്, ലിസാനുല്‍ ഖുര്‍ആന്‍, എന്നിവയും ഉള്‍ക്കൊള്ളുന്നു. സ്വഭാവ സംസ്‌കരണ പാഠങ്ങളില്‍ മാലിന്യ സംസ്‌കരണം, ശുചിത്വം, പരിസ്ഥിതി സംരക്ഷണം എന്നിവയിലൂന്നി പ്ലാസ്റ്റിക് നിര്‍മാര്‍ജനം പോലുള്ള ആധുനിക വിഷയങ്ങളും വിദ്യാര്‍ഥികളെ ഉദ്‌ബോധിപ്പിക്കുന്നു. ഖുര്‍ആന്‍ പാരായണം, ഖുര്‍ആന്‍ പാരായണ നിയമങ്ങള്‍, പാഠഭാഗങ്ങള്‍ എളുപ്പത്തില്‍ മനസിലാക്കാന്‍ ഉപയോഗപ്പെടുന്ന പാട്ടുകള്‍, നിസ്‌കാരം,വുളൂഅ്, തയമ്മും തുടങ്ങി കര്‍മശാസ്ത്ര പഠന ഭാഗമായി പ്രായോഗിക പരിശീലനങ്ങളുടെ വിഡിയോ വിശദീകരണങ്ങള്‍ എന്നിവ  ഡിജിറ്റല്‍ കണ്ടന്റായി ചേര്‍ത്തിട്ടുണ്ട്. ചിത്ര സഹിതമുള്ള  പുസ്തകങ്ങള്‍ അറബി മലയാള ലിപി, അറബി ഭാഷാ പഠനം എന്നിവയെ അടിസ്ഥാനമാക്കിയാണ്. ഇതിന്റെ അറബിത്തമിഴ്അറബിക്കന്നട പതിപ്പുകളും തയാറാക്കും. എല്ലാ പുസ്തകങ്ങള്‍ക്കും ഹാന്‍ഡ് ബുക്കുകളും തയാറാക്കിയിട്ടുണ്ട്.