ദുബായ്: ഐസിസി ചാമ്പ്യൻസ് ട്രോഫിയിൽ നാളെ നടക്കുന്ന നിർണായ മത്സരത്തിൽ പാകിസ്താനെ നേരിടാൻ ഒരുങ്ങിയിരിക്കുകയാണ് ഇന്ത്യ. ആദ്യ മത്സരത്തിൽ ബംഗ്ലാദേശിനെ ആറ് വി ക്കറ്റുകൾക്ക് തകർത്ത ഇന്ത്യക്ക് രണ്ടാം മത്സരത്തിൽ വിജയം തുടർന്നാൽ സെമിയിലേക്ക് മുന്നേറാൻ സാധിക്കും. എന്നാൽ ഈ മത്സരത്തിനു മുന്നോടിയായി ഇന്ത്യൻ ടീമിന് നിരാശ നൽകുന്ന ഒരു വാർത്തയാണ് ഇപ്പോൾ പുറത്തുവന്നിരിക്കുന്നത്. 

വിക്കറ്റ് കീപ്പർ ബാറ്റർ റിഷബ് പന്തിന് വൈറൽ ഫീവർ ബാധിച്ചിരിക്കുകയാണ്. ഇന്ത്യൻ വൈസ് ക്യാപ്റ്റൻ ശുഭ്മൻ ഗില്ലാണ് ഇക്കാര്യം അറിയിച്ചത്. ചാമ്പ്യൻസ് ട്രോഫിക്ക് മുമ്പായുള്ള പരിശീലനത്തിൽ പന്തിന്റെ കാൽമുട്ടിന് പരിക്കേറ്റിരുന്നു.

അതുകൊണ്ടുതന്നെ ആദ്യ മത്സരത്തിൽ താരത്തിന് ടീമിൽ ഇടം നേടാൻ സാധിച്ചിരുന്നില്ല. ഈ പരിക്കിൽ നിന്നും പന്ത് മോചിതനായി വരുന്ന സമയത്ത് തന്നെയാണ് ഇപ്പോൾ താരത്തെ വൈറൽ ഫീവറും ബാധിച്ചിരിക്കുന്നത്. പന്തിന് പകരം കെഎൽ രാഹുൽ ആയിരുന്നു ഇന്ത്യയുടെ വിക്കറ്റ് കീപ്പർ സ്ഥാനത്ത് കളിച്ചിരുന്നത്.

അതേസമയം ഗ്രൂപ്പ്‌ ഘട്ടത്തിലെ ആദ്യ മത്സരത്തിൽ പാകിസ്താൻ പരാജയപ്പെട്ടിരുന്നു. ന്യൂസിലാൻഡിനെതിരെ 60 റൺസിനാണ് പാകിസ്താൻ പരാജയം ഏറ്റുവാങ്ങിയത്. മത്സരത്തിൽ ആദ്യം ബാറ്റ് ചെയ്ത ന്യൂസിലാൻഡ് 320 റൺസാണ് നേടിയത്. എന്നാൽ വിജയലക്ഷ്യം പിന്തുടർന്നിറങ്ങിയ പാകിസ്താൻ 260 റൺസിന്‌ പുറത്താവുകയായിരുന്നു. ടൂർണമെന്റിൽ അടുത്ത റൗണ്ടിലേക്ക് മുന്നേറണമെങ്കിലും പാകിസ്താന് ഇന്ത്യക്കെതിരെ ജയം അനിവാര്യമാണ്.