ലണ്ടൻ: ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് സമനില കുരുക്ക്. എവർട്ടണാണ് റെഡ് ഡെവിൾസിനെ സമനിലയിൽ ആക്കിയത്. മത്സരത്തിൽ ഇരു ടീമുകളും രണ്ട് ഗോൾ വീതം നേടി പോയിന്റുകൾ പങ്കുവെക്കുകയായിരുന്നു. 

മത്സരത്തിൽ മാഞ്ചസ്റ്റർ യൂണൈറ്റഡിനായി ബ്രൂണോ ഫെർണാണ്ടസ് നേടിയ തകർപ്പൻ ഗോൾ ആണ് ഏറെ ശ്രദ്ധ നേടിയത്. രണ്ടാം പകുതിയിൽ ലഭിച്ച ഫ്രീ കിക്ക് അതിമനോഹരമായി ബ്രൂണോ എതിരാളികളുടെ പോസ്റ്റിൽ എത്തിക്കുകയായിരുന്നു. മൂന്ന് വർഷങ്ങൾക്ക് ശേഷമാണ് മാഞ്ചസ്റ്റർ യുണൈറ്റഡിന് വേണ്ടി ഇംഗ്ലീഷ് പ്രീമിയർ ലീഗിൽ ഒരു താരം ഫ്രീകിക്കിലൂടെ ഗോൾ നേടുന്നത്. 

2022ൽ നോർവിച്ച് സിറ്റിക്കെതിരെ സൂപ്പർതാരം ക്രിസ്റ്റ്യാനോ  റൊണാൾഡോ ആയിരുന്നു അവസാനമായി മാഞ്ചസ്റ്റർ യുണൈറ്റഡിന് വേണ്ടി ഫ്രീ കിക്കിലൂടെ ഗോൾ നേടിയിരുന്നത്. റൊണാൾഡോക്ക് ശേഷം മറ്റൊരു താരത്തിനും ഫ്രീ കിക്കിലൂടെ മാഞ്ചസ്റ്റർ യുണൈറ്റഡിനായി ഗോൾ നേടാൻ സാധിച്ചിരുന്നില്ല. 

അതേസമയം മത്സരത്തിന്റെ ആദ്യ പകുതിയിൽ ബെറ്റോയിലൂടെയും അബ്ദുള്ള ഡൗക്കോറയിലൂടെയും എവർട്ടൻ  രണ്ട്‌ ഗോൾ നേടി മുന്നിൽ എത്തിയിരുന്നു. എന്നാൽ രണ്ടാം പകുതിയിൽ മാഞ്ചസ്റ്റർ യുണൈറ്റഡ് രണ്ടു ഗോളുകൾ തിരിച്ചടിച്ചുകൊണ്ട് സമനില നേടുകയായിരുന്നു. ബ്രൂണോയും മാനുവൽ ഉഗാർട്ടയുമാണ് ഗോളുകൾ നേടിയത്. 

നിലവിൽ ഇംഗ്ലീഷ് പ്രീമിയർ ലീഗിന്റെ പോയിന്റ് പട്ടികയിൽ പതിനഞ്ചാം സ്ഥാനത്താണ് മാഞ്ചസ്റ്റർ യുണൈറ്റഡ്. 26 മത്സരങ്ങളിൽ നിന്നും 8 വിജയവും 6 സമനിലയും 12 തോൽവിയുമായി 30 പോയിന്റാണ് മാഞ്ചസ്റ്റർ യുണൈറ്റഡിന്റെ കൈവശമുള്ളത്. അതേസമയം 26 മത്സരങ്ങളിൽ നിന്നും ഏഴ് വിജയവും 10 സമനിലയും ഒമ്പത് തോൽവിയും അടക്കം 31 പോയിന്റുമായി പന്ത്രണ്ടാം സ്ഥാനത്താണ് എവർട്ടൺ. ഇംഗ്ലീഷ് പ്രീമിയർ ലീഗിൽ ഫെബ്രുവരി 27ന് ഇപ്സ്വിച്ച് ടൗണിനെതിരെയാണ് മാഞ്ചസ്റ്റർ യുണൈറ്റഡിന്റെ അടുത്ത മത്സരം.