ബാങ്കോക്ക്: തായ്‌ലന്‍ഡില്‍ 21 പേരെ വെടിവെച്ചു കൊന്ന സൈനികനെ സുരക്ഷാസേന വധിച്ചു. സൂറതമ്പിതക് സൈനിക ക്യാംപിലെ സബ് ലഫ്റ്റനന്റ് ജക്രപന്ത് തോമ്മയെയാണ് സൈന്യം വധിച്ചത്.

വടക്കുകിഴക്കന്‍ നഗരമായ നഖോന്‍ റാച്ചസിമ നഗരത്തിലാണ് സംഭവം. സൈനിക വാഹനത്തില്‍ നഗരത്തിന്റെ വിവിധ ഭാഗങ്ങളിലെത്തിയ അക്രമി ജനങ്ങള്‍ക്കുനേരെ വെടിയുതിര്‍ക്കുകയായിരുന്നു. നിരവധി പേരെ ബന്ദിയാക്കുകയും ചെയ്തു. വെടിവെപ്പില്‍ 14 പേര്‍ക്ക് പരുക്കേറ്റു. ആക്രമണം ഇയാള്‍ സാമൂഹികമാധ്യമങ്ങളിലൂടെ തത്സമയം സംപ്രേഷണം ചെയ്യുകയും ചെയ്തിരുന്നു.

അക്രമിയെ കീഴ്‌പ്പെടുത്താനുള്ള സൈനിക നടപടിയ്ക്കിടെ നടന്ന വെടിവെപ്പില്‍ മറ്റൊരു സൈനികനും കൊല്ലപ്പെട്ടു.